Fyrsta umferð Domino‘s deildar kvenna í körfuknattleik var leikin í gærkvöldi. Í Stykkishólmi mættust Snæfell og Keflavíl, liðin sem áttust við í úrslitaviðureign Íslandsmótsins síðasta vor. Að lokum fór svo að Íslandsmeistarar Keflavíkur höfðu betur, 63-77.

Mikið jafnfræði var með liðunum í fyrsta leikhluta. Þau fylgdust að í öllum sínum aðgerðum og aldrei munaði meira þremur stigum. Snæfellskonur virtust ákveðnar í að hefna vorsins, sýndu mikla baráttu og léku skipulega. Þær leiddu að loknum fyrsta leikhluta, 23-20. En lið Keflavíkur er sívinnandi og með góðum spretti í upphafi annars leikhluta og komust þær fjórum stigum yfir, 25-29. Snæfell jafnaði í 32-32 og leikurinn var í járnum um miðjan fjórðunginn. Keflavík náði smá lokaspretti, tók forystuna að nýju og leiddi með fimm stigum í hálfleik, 36-41.

Þáttaskil í þriðja leikhluta

Leikurinn var áfram jafn og spennandi eftir hléið. Keflavíkurkonur leiddu en Snæfell fylgdi þeim eins og skugginn. Um miðjan þriðja leikhluta urðu hins vegar þáttaskil í leiknum. Íslandsmeistararnir náði frábærum kafla og breyttu þriggja stiga forskoti í 18 stiga forystu áður en leikhlutinn var úti, 42-60. Snæfell missti aðeins tökin í vörninni og Keflavík refsaði um leið. Snæfell átti erfitt uppdráttar í þriðja leikhluta þar sem liðið skoraði ekki nema sex stig.

Snæfell náði aðeins að koma til baka um miðjan lokafjórðunginn og minnka muninn í tíu stig. Keflavík hafði hins vegar góð tök á leiknum og gætti þess að missa sigurinn ekki úr greipum sér. Lokatölur urðu 63-77, Keflavík í vil.

Vesturlandsslagur framundan

Kristen McCarthy var atkvæðamest Snæfells í leiknum. Hún skoraði 23 stig og tók 12 fráköst. Berglind Gunnardóttir var með 14 stig, 9 fráköst og 5 stoðsendingar en aðrar höfðu minna.

Brittany Dinkins var stigahæst Keflvíkinga með 26 stig og 11 stoðsendingar og 7 fráköst að auki.

Næsti leikur Snæfells fer fram á sunnudaginn, 8. október næstkomandi, þegar liðið mætir Skallagrími í Vesturlandsslag í Borgarnesi.

Keflavík sigraði í Hólminum