Lokaumferð Pepsi deildar karla í knattspyrnu fór fram á laugardag. Á Akranesi mættust ÍA og Víkingur Ó. í leik þar sem Ólafsvíkingar höfðu allt að vinna en engu að tapa. Þeir þurtu á sigri að halda til að bjarga sér frá falli, en um leið að treysta á að ÍBV sigraði ekki KA í Vestmannaeyjum.

Liðsmenn Víkins voru sókndjarfir í upphafi leiks en Skagamenn hleyptu þeim ekki í nein alvöru færi. Kwame Quee átti tvo skot langt utan af velli sem bæði voru varin en gestirnir ógnuðu markinu ekki að öðru leyti. Eftir því sem leið á fyrri hálfleikinn sóttu leikmenn ÍA í sig veðrið og tóku að sækja. Á 28. mínútu fékk ÍA vítaspyrnu eftir að Gabrielius Zagurskas braut á Steinari Þorsteinssyni. Albert Hafsteinsson steig á punktinn en Christian Martinez gerði sér lítið fyrir og varði vítaspyrnuna.

Skömmu síðar fékk Víkingur ágætis færi eftir fyrirgjöf en varnarmenn ÍA komust fyrir skotið en að öðrum kosti ógnuðu þeir helst með skotum af löngu færi. Skagamenn kunnu einnig að leika þann leik og stuttu fyrir hálfleik munaði engu að Steinar Þorsteinsson skoraði með skoti af 25 metrunum en boltinn hárfínt framhjá. Hvorugu liði tókst að skora í fyrri hálfleik og staðan því markalaus í hléinu.

Víkingur byrjaði síðari hálfleikinn af krafti. Pape Mamadou Faye átti skalla að marki eftir aukaspyrnu sem Árni Snær Ólafsson varði. Upp úr því myndaðist mikil þvaga þar sem margir reyndu að koma fæti í boltann en að lokum losnaði um þvöguna í teignum. Skömmu síðar átti Þorsteinn Már Ragnarsson hörkuskot að marki utan teigs sem Árni Snær þurfti að hafa sig allan við að verja. En besta færi síðari hálfleiks fengu Skagamenn. Hann fékk góða sendingu inn fyrir vörn gestanna og ætlaði að skalla að marki en hitti einfaldlega ekki boltann úr dauðafæri. Þegar þarna var komið við sögu voru Skagamenn sterkari. Það var ekki fyrr en seint í leiknum að liðsmenn Víkings tóku við sér að nýju og þyngdu sóknina. Pape átti skalla hárfínt framhjá eftir hornspyrnu og þegar tíu mínútur lifðu leiks átti Kwame þrumuskot sem Árni Snær varði í þverslána. Á lokamínútunum skiptust liðin á að brenna af ágætum færum og leiknum lauk síðan með markalausu jafntefli.

Þar með varð ljóst að Víkingur verður samferða ÍA niður í 1. deild karla í knattspyrnu. Á sama tíma sigraði ÍBV reyndar KA í Vestmannaeyjum og úrslit leiksins á Akranesi hefðu ekki skipt máli. Víkingur Ó. vann sex leiki og gerði fjögur jafntefli í deildinni í sumar. Skilaði það liðinu 22 stigum sem dugðu aðeins til að enda í 11. og næstneðsta sæti deildarinnar. ÍA sigraði aðeins þrjá leiki en gerði átta jafntefli. Skagamenn luku því mótinu í botnsæti deildarinnar með 17 stig. Bæði lið eru fallin og ljóst að ÍA og Víkingur Ó. mætast aftur næsta sumar.

: Kwame Quee fer framhjá varnarmanni ÍA. Ljósm. gbh.

: Atgangur í vítateig ÍA en inn fór boltinn ekki. Ljósm. gbh.

: Stefán Teitur Þórðarson á miklum spretti með boltann. Ljósm. gbh.

Víkingur Ó. samferða ÍA niður