ÍA og Víkingur R. mættust í næstsíðustu umferð Pepsi deildar karla í knattspyrnu í gær. Leikurinn fór fram á Víkingsvelli í Reykjavík og lauk með markalausu jafntefli. Nokkur haustbragur var á leiknum, Skagamenn voru fallnir áður en leikurinn hófst og heimamenn svo gott sem hólpnir. Bar leikurinn þess merki að lítið væri í húfi fyrir liðin.

Leikurinn fór afar rólega af stað og fátt markvert gerðist fyrstu 20 mínúturnar. Fyrsta færi leiksins kom á 24. mínútu þegar Steinar Þorsteinsson slapp einn í gegn. Hann vippaði boltanum yfir markvörðinn en varnarmaður bjargaði á línu. Skömmu síðar áttu Skagamenn annað dauðafæri. Róbert Örn Óskarsson varði skalla út í teiginn og upp úr því varð nokkur atgangur. Endaði það með því að boltinn small í þverslá heimamanna og þaðan frá marki. Þriðja sinni voru Skagamenn nálægt því að komast yfir rétt fyrir hálfleik. Þórður Þorsteinn Þórðarson átti frábæra aukaspyrnu beint á kollinn á Arnari Má Guðjónssyni en Róbert varði frá honum. Staðan því markalaus í hálfleik.

Síðari hálfleikur fór fjörlega af stað og Skagamenn fengu tvö hálffæri strax í upphafi hans. Stefán Teitur Þórðarson komst fyrst í ákjósanlegt færi en varnarmaður Víkings náði að henda sér fyrir skotið. Næst geystist Þórður Þorsteinn upp völlinn í skyndisókn ÍA og átti skot úr þröngu færi sem Róbert varði.

Seinna í leiknum kom Geoffrey Castillion boltanum í netið eftir langa sendingu en var rangstæður og markið stóð því ekki. Undir lok leiksins hefðu bæði lið geta stolið sigrinum. Fyrst komust Skagamenn í dauðafæri. Steinar Þorsteinsson var kominn einn í gegn og hafði góðan tíma til að athafna sig en skot hans hárfínt framhjá samskeytunum. Á lokamínútu leiksins áttu heimamenn svo skalla að marki sem small í þverslánni. Staðan því markalaus þegar flautað var til leiksloka.

ÍA er sem fyrr segir fallið úr deild þeirra bestu. Liðið hefur 16 stig í botnsæti deildarinnar. Í lokaleik sumarsins næstkomandi laugardag mæta Skagamenn liði Víkings Ó. á Akranesvelli.

ÍA og Víkingur R. skildu jöfn