Víkingur Ó. og Víkingur R. mættust í fallbaráttuslag í Pepsi deild karla í gær. Leikurinn, sem fór fram í Ólafsvík, átti upphaflega að fara fram á sunnudaginn en var frestað um sólarhring vegna veðurs. Ekki var veðrið ákjósanlegt til knattspyrnuiðkunar í gær heldur, grenjandi rigning og töluverður strekkingur, en nógu gott til að hægt væri að spila leikinn þó það gerði leikmönnum á köflum erfitt fyrir.

Leikurinn fór fremur rólega af stað þar sem báðum liðum gekk illa að spila boltanum á milli sín á rennblautum vellinum. Fyrsta alvöru færi leiksins kom ekki fyrr en á 26. mínútu og úr því skoruðu gestirnir frá Reykjavík. Davíð Örn Atlason sendi fallega sendingu á Geoffrey Castillion sem fékk boltann í vítateig Ólsara og skoraði. Christian Martinez var hársbreidd frá því að verja en inn fór boltinn og gestirnir komnir yfir.

Litlu munaði að gestirnir bættu við öðru marki skömmu síðar en Nacho Herras náði að bjarga með frábærri tæklingu. Hættulegasta færi heimamanna í fyrri hálfleik kom eftir aukaspyrnu rétt utan teigs. Pape Mamadou Faye spyrnti en skot hans fór yfir.

Síðari hálfleikur fór rólega af stað, rétt eins og sá fyrri og leikmenn áttu ekki sjö dagana sæla í bleytunni. Liðin áttu erfitt með að skapa sér færi og leikurinn var ekki sérstaklega mikið fyrir augað.

Á 63. mínútu komust gestirnir yfir þegar Alexis Egea, varnarmaður Víkings Ó., skoraði afar slysalegt sjálfsmark. Gestirnir sóttu og áttu skalla að marki. Alexis stökk hatt í loft og freistaði þess að skalla frá. Hann hitti boltann illa og skallaði hann aftur fyrir sig og yfir Martinez sem var kominn út úr markinu.

En heimamenn voru ekki lengi að svara fyrir sig. Aðeins mínútu síðar minnkuðu þeir muninn þegar Pape fylgdi eftir skoti Þorsteins Más Ragnarssonar af stuttu færi. Staðan orðin 1-2 og búið að hleypa smá lífi í leikinn. Ólafsvíkurliðið færði sig framar á völlinn og freistuðu þess að jafna metin. Það var hins vegar til einskis því gestirnir fengu vítaspyrnu á 76. mínútu leiksins. Castillion steig á punktinn og skoraði af miklu öryggi. Staðan orðin 1-3, gestunum í vil og róðurinn orðinn afar þungur fyrir Ólafsvíkurliðið.

Bæði lið fengu ágæt færi það sem eftir lifði leiks en mörkin urðu ekki fleiri. Víkingur R. sigraði með þremur mörkum gegn einu.

Víkingur Ó. situr eftir leikinn í 11. og næstneðsta sæti deildarinnar með 20 stig, einu stigi minna en Fjölnir í sætinu fyrir ofan og tveimur stigum á eftir ÍBV. Næst leikur Víkingur Ó. sunnudaginn 24. september næstkomandi þegar liðið tekur á móti FH í Ólafsvík.

: Menn voru ófeimnir við að henda sér í tæklingar á rennblautum Ólafsvíkurvelli. Hér stekkur Alfreð Már Hjaltalín upp úr einn slíkri. Ljósm. tfk.

Róðurinn að þyngjast hjá Víkingi