Lokaumferð 3. deildar karla í knattspyrnu var leikin síðastliðinn laugardag. Lið Kára, sem þegar hafði tryggt sér sigur í deildinni, mætti Dalvík/Reyni í Akraneshöllinni.

Káramenn léku með sorgarbönd í leiknum til minningar um Arnar Dór Hlynsson, dyggan stuðningsmann og góðan dreng. Arnar Dór lést síðastliðinn fimmtudag eftir erfið veikindi aðeins 38 ára að aldri.

Yfirburðir Kára voru miklir í leiknum á laugardag. Skemmst er frá því að segja að Káramenn luku mótinu með stæl og unnu stórsigur, 6-1. Ingvar Gylfason kom gestunum yfir í upphafi leiks en eftir það sáu norðanmenn aldrei til sólar. Alexander Már Þorláksson jafnaði á 12. mínútu og Páll Sindri Einarsson kom Kára yfir á 39. mínútu og Kári leiddi í hálfleik, 2-1. Alexander skoraði annað mark sitt á 59. mínútu og kom Kára í 3-1 og Eggert Kári Karlsson bætti við fjórða marki liðsins á 72. mínútu. Næst skoraði fyrirliðinn Einar Logi Einarsson á 80. mínútu áður en Guðlaugu Þór Brandsson rak smiðshöggið á 91. mínútu og innsiglaði stórsigur Kára.

Að leiknum loknum fengu þeir afhentan bikar fyrir sigur sinn í 3. deild karla. Skagamaðurinn Gísli Gíslason, stjórnarmaður KSÍ, sæmdi leikmenn Kára verðlaunapeningum áður en hann afhenti bikarinn. Það voru þeir Sveinbjörn Geir Hlöðversson, formaður Kára og Einar Logi Einarsson, fyrirliði liðsins, sem veittu bikarnum viðtöku.

: Bikarinn bíður þess að fara á loft. Ljósm. gbh.

: Einar Logi Einarsson, fyrirliði Kára, tekur við bikarnum úr hendi Gísla Gíslasonar, stjórnarmanns KSÍ. Ljósm. gbh.

: Sveinbjörn Geir Hlöðversson, formaður Kára og Einar Logi hefja bikarinn á loft. Ljósm. gbh.

: Formaðurinn var að sjálfsögðu tolleraður eftir leik. Ljósm. gbh.

: Hér fagna sigrinum þeir Eggert Halldórsson stuðningsmaður Kára og Sveinbjörn formaður. Ljósm. gbh.

: Svipmynd úr leiknum. Ljósm, gbh.

: Svipmynd úr leiknum. Ljósm, gbh.

: Svipmynd úr leiknum. Ljósm, gbh.

Káramenn hófu bikar á loft