ÍA og Stjarnan mættust í 20. umferð Pepsi deildar karla í knattspyrnu í gær. Leikið var á Akranesi og lokatölur urðu 2-2, svekkjandi úrslit fyrir bæði lið. Þar með missti Stjarnan endanlega af Íslandsmeistaratitlinum og von Skagamanna á að halda sæti sínu í deildinni er orðin afar veik.

Skagamenn voru ekki lengi að ná forystunni í leiknum. Ekki var liðin mínúta þegar Stefán Teitur Þórðarson sendi boltann fyrir markið frá vinstri, beint á kollinn á Arnari Má Guðjónssyni sem skallaði boltann í netið.

Stjarnan lék með vindinn í bakið í fyrri hálfleik og stjórnuðu ferðinni lengst af. Þeir jöfnuðu metin á 10. mínútu þegar Guðjón Baldvinsson slapp einn innfyrir vörn Skagamanna og lyfti boltanum yfir Árna Snæ Ólafsson í markinu. Stjörnumenn héldu áfram að pressa eftir markið en Skagamenn voru mjög agaðir í leiknum, lágu til baka og gáfu ekki tommu eftir. Sóknir ÍA voru að sama skapi vel útfærðar. Bæði lið áttu stangarskot í fyrri hálfleik en hvorugu liði tókst að bæta við marki og staðan því jöfn í hléinu, 1-1.

Leikmenn Stjörnunnar voru sterkari framan af síðari hálfleik og þeir komust yfir á 59. mínútu eftir frábæra skyndisókn. Hilmar Árni Halldórsson geystist upp völlinn, renndi boltanum út á Jósef Kristinn Jósefsson sem sendi hann fyrir á Hólmbert Aron Friðjónsson sem skoraði af stuttu færi. Skagamenn vildu meina að Hólmbert hefði verið rangstæður en dómari leiksins var á öðru máli. Markið stóð og Stjarnan komin yfir.

Skagamenn efldust við mótlætið og lögðu allt í sölurnar, enda fallnir ef leikurinn tapaðist. Þeir sóttu stíft og sköpuðu sér nokkur hálffæri næstu mínúturnar. Á 81. mínútu voru þeir hársbreidd frá því að jafna. Eftir hornspyrnu og mikinn darraðadans í vítateig Stjörnunnar áttu Skagamenn þrumuskot í þverslána. Frákastið sveif upp í loft og þaðan var boltinn skallaður að marki en small aftur í þverslánni áður en Stjörnumenn björguðu á ævintýralegan hátt. Heppnin svo sannarlega með gestunum þarna.

Á 88. mínútu náðu Skagamenn loks að jafna þegar Steinar Þorsteinsson skoraði. Boltinn skoppaði yfir varnarmann Stjörnunnar í vítateignum. Arnar Már átti vippu að marki sem bjargað var á línu. Eftir mikinn barning í teignum tókst Steinari að koma boltanum yfir línuna og jafna metin.

Rétt fyrir leikslok fékk Hólmbert, leikmaður Stjörnunnar, þungt höfuðhögg eftir harkalegt samstuð við leikmann ÍA. Hólmbert fékk slæman heilahristing og krampa í kjölfarið. Var hann umsvifalaust fluttur af velli með sjúkrabíl og komið undir læknishendur til aðhlynningar.

Hvorugu liðinu tókst að skora í uppbótartímanum og lauk leiknum því með jafntefli, 2-2.

Skagamenn hafa 15 stig á botni deildarinnar, sex stigum frá öruggu sæti þegar tveir leikir eru eftir í mótinu. Þeir þurfa að vinna báða leikina og treysta á að Fjölnir, sem situr í 10. sæti, tapi báðum leikjum sínum. Enn fremur þurfa Skagamenn að skora fimm mörkum meira en Fjölnir í lokaleikjunum tveimur.

Næsti leikur ÍA fer fram á sunnudaginn, 24. september næstkomandi, þegar liðið mætir Víkingir R. á útivelli.

: Skagamenn fagna marki Arnars Más Guðjónssonar í upphafi leiks. Ljósm. gbh.

Dramatískt jafntefli á Akranesvelli