Víkingur Ó. datt niður í fallsæti í Pepsi deild karla í knattspyrnu eftir 3-0 tap gegn Stjörnunni á útivelli í gær.

Heimamenn voru mun sterkari í fyrri hálfleik og komust yfir eftir hálftíma leik með marki frá Hilmari Árna Halldórssyni. Eyjólfur Héðinsson renndi boltanum á Hilmar sem lét vaða fyrir utan teig. Skot hans var ekkert sérlega fast og ekki virtist sem Christian Martinez í marki Víkings myndi eiga í nokkrum vandærðum með að verja. En svo bregðast krosstré sem önnur tré og Christian missti boltann klaufalega í netið. Stjarnan komin í 1-0 og þannig var staðan í hálfleik.

Leikmenn Víkings voru sprækari eftir hléið og sköpuðu sér ágæt færi í upphafi síðari hálfleiks. Fyrst átti Elvinas Zagurskas hörkuskot af löngu færi sem varið var í horn. Skömmu síðar komst Þorsteinn Már Ragnarsson í dauðfæri en aftur varði Haraldur Björnsson í marki Stjörnunnar.

Heimamenn náðu betri tökum á leiknum eftir því sem leið á síðari hálfleikinn og juku sóknarþungann. Á tveggja mínútna kafla þegar um korter var eftir gerðu þeir síðan út um leikinn með tveimur mörkum. Fyrst skoraði Hólmbert Aron Friðjónsson á 75. mínútu með góðu skoti í stöngina og inn. Aðeins tveimur mínútum síðar bætti Stjarnan við þriðja markinu í leiknum. Guðjón Baldvinsson átti þá skot sem hafði viðkomu í samherja hans Ólafi Karli Finsen og fór þaðan í netið. Staðan orðin 3-0 fyrir Stjörnunni sem réði ferðinni allt til leiksloka. Fleiri mörk voru þó ekki skoruð og Stjarnan sigraði því með þremur mörkum gegn engu.

Úrslit gærvköldsins þýða að Víkingur Ó. datt niður í fallsæti því fyrr í gær hafði ÍBV sigur á Grindavík. Víkingur hefur 20 stig í 11. og næstneðsta sæti, stigi á eftir Fjölni og tveimur stigum á eftir ÍBV í sætunum fyrir ofan.

Næst leikur Víkingur Ó. á sunnudaginn, 17. september næstkomandi, þegar liðið mætir Víkingi R. í Ólafsvík.

Víkingur Ó. í fallsæti eftir tap gegn Stjörnunni