Liðsmenn Víkings Ó. fengu skell þegar þeir mættu KA á Akureyri í gær. Heimamenn voru miklu sterkari og unnu að lokum stórsigur, 5-0.

Ólsarar urðu fyrir áfalli í upphafi því fyrirliðinn Guðmundur Steinn Hafsteinsson meiddist eftir aðeins þrjár mínútur og varð að fara af velli. Heimamenn voru mjög ákveðnir og komust yfir á 10. mínútu. Eftir góða fyrirgjöf frá hægri kom skalli að marki en Christian Martinez náði að slæma hendi í boltann og slá út í teiginn. Þar var Almarr Ormarsson mættur og skallaði frákastið í netið, 1-0 fyrir KA.

Aðeins mínútu síðar munaði litlu að heimamenn skoruðu aftur. Mikill atgangur var í teig Víkings og Christian varði skot af stuttu færi og handsamaði síðan boltann að lokum.

KA-menn réðu lögum og lofum á vellinum næsta hálftímann eða svo. Þeir áttu hverja marktilraunina á fætur annarri og mark lá í loftinu. Á 35. mínútu skoruðu þeir öðru sinni og eftir fallegan samleik. Ásgeir Sigurgeirsson lagði boltann út úr teignum á Elfar Árna Aðalsteinsson sem sendi inn fyrir vörnina, gegnum klof varnarmanns og fyrir fætur Almars sem þrumaði boltanum upp í markhornið.

Leikmenn Víkings lifnuðu aðeins við á lokamínútum fyrri hálfleiks. Þeir fengu dauðafæri en voru dæmdir rangstæðir og síðan átti Eric Kwakwa skot rétt yfir markið eftir laglega sókn. Fleiri mörk voru hins vegar ekki skoruð í fjörugum fyrri hálfleik.

Þrenna Elfars í seinni hálfleik

Ólsarar mættu gríðarlega ákveðnir til síðari hálfleiks og höfðu öll völd á vellinum í upphafi hans. Á 47. mínútu fengu þeir vítaspyrnu. Callum Williams var dæmdur brotlegur eftir að hafa farið upp í skallaeinvígi við Egil Jónsson. Kenan Turudija fór á vítapunktin en Srdjan Rajkovic gerðis ér lítið fyrir og varði frá honum. KA-menn efldust til muna eftir þetta atvik en vindurinn virtist úr leikmönnum Víkings. Heimamenn réðu lögum og lofum á vellinum það sem eftir lifði leiks. Eftir að hafa skapað sér nokkur ágæt færi skoruðu þeir þriðja markið á 63. mínútu. Eftir mikið hnoð í teignum barst boltinn á Elfar sem setti boltann í netið út við nærstöngina.

Fimm mínútum síðar skoraði Elfar aftur. Heimamenn geystust upp völlin, Emil Lyng átti góða fyrirgjöf sem varnarmönnum Víkings tókst ekki að komast í. Elfar tók boltann á brjóstkassann og lagði hann síðan örugglega í hornið, framhjá Christian í markinu.

Á 76. mínútu fullkomnaði Elfar síðan þrennuna. Góð hornspyrna KA sveif inn í vítateig Víkings. Elfar reis manna hæst, skallaði boltann í jörðina og þaðan í netið og kom KA í 5-0.

Þannig urðu lokatölur leiksins. Víkingar sitja í 10. sæti deildarinnar með 19 stig, þremur stigum á undan ÍBV í næstneðsta sætinu en jafn mörg og Fjölnir í sætinu fyrir ofan. Víkingur og Fjölnir mætast einmitt í næstu umferð, laugardaginn 9. september næstkomandi. Sá leikur fer fram á Ólafsvíkurvelli.

Víkingur Ó. steinlá fyrir norðan