Víkingur Ólafsvík nældi sér í þrjú dýrmæt stig í fallbaráttu Pepsi deildar karla með sterkum 0-1 útisigri á nýkrýndum bikarmeisturum ÍBV í gærkvöldi.

Leikmenn Víkings voru sterkari framan af fyrri hálfleik og stjórnuðu gangi mála inni á vellinum. Heimamenn í ÍBV lágu hins vegar til baka og freistuðu þess að sækja hratt. Hvorugu liði tókst hins vegar að skapa sér álitleg færi framan af. Það var ekki fyrr en eftir hálftíma leik að Víkingar hefðu getað komist yfir. Eftir laglegan samleik barst boltinn á Kenan Turudija sem var í fínu færi í vítateignum. Kenan skaut að marki en boltinn small í þverslánni. Víkingar óheppnir að komast ekki yfir og heimamenn heppnir að sleppa með skrekkinn. Reyndist sláarskot Kenans vera besta færi fyrri hálfleiks og staðan markalaus í hléinu.

Síðari hálfleikur fór frekar rólega af stað en heldur voru leikmenn ÍBV frískari eftir hléið en í fyrri hálfleik. Þeir gerðu þó engar rósir, fengu örfá hálffæri en náðu ekki að ógna marki Víkings.

Komust yfir manni færri

Á 69. mínútu leiksins dró síðan heldur betur til tíðinda. Kwame Quee fór í tæklingu og braut á Gunnari Heiðari Þorvaldssyni. Hlaut Kwame að launum rauða spjaldið frá Helga Mikael Jónssyni dómara. Leikmenn Víkings ekki sáttir og atvikið umdeilt. Var það mál manna að rauða spjaldið væri afar harður dómur. Bæði leikmenn og áhorfendur áttu von á að sjá gult spjald fara á loft en það rauða kom flestum í opna skjöldu.

En það tjáir ekki að deila við dómarann og leikurinn hélt áfram. Mótlætið þjappaði Ólsurum saman og aðeins fjórum mínútum eftir rauða spjald Kwame komust þeir yfir. Alfreð Már Hjaltalín fór þá vel með boltann úti á hægri kanti, sneri á varnarmann ÍBV og sendi gullfallega fyrirgjöf beint á kollinn á Guðmundi Steini Hafsteinssyni sem skallaði boltann í fjærhornið.

Eyjamenn gerðu sóknarsinnaðar breytingar á liði sínu og freistuðu þess að jafna metin en það gekk hvorki né rak hjá þeim. Víkingsliði féll til baka og varðist vel. Þorsteinn Már Ragnarsson hefði getað gulltryggt sigur Víkings á 84. mínútu eftir skyndisókn. Hann slapp einn í gegn en skaut beint í bringuna á Derby Carillo í marki ÍBV. Aftur fékk Þorsteinn már gott færi skömmu fyrir leikslok eftir góðan undirbúning Guðmundar Steins, en brenndi af úr upplögðu marktækifæri. Það kom þó ekki af sök því Eyjamenn fengu engin ákjósanleg færi það sem eftir lifði leiks og Víkingur fór því með sigur af hólmi, 0-1 og þrjú stig í farteskinu til Ólafsvíkur.

Dýrmætur sigur

Með sigrinum lyfti Víkingur sér upp í 7. sæti deildarinnar. Þeir hafa 19 stig eftir 15 leiki, stigi meira en næstu tvö lið fyrir neðan en þremur stigum á eftir næstu liðum fyrir ofan. Það sem meira er um vert er að með sigrinum steig liðið stórt skref í að halda sæti sínu í deildinni.

Næst leikur liðið gegn Breiðabliki sunnudaginn 20. ágúst næstkomandi. Sá leikur fer fram í Ólafsvík.

Víkingur Ó. sótti dýrmæt stig til Eyja