ÍA vann 5-0 stórsigur á Hömrunum þegar liðin mættust 14. umferð 1. deildar kvenna í knattspyrnu. Leikurinn fór fram í blíðskaparveðri á Akranesi sl. laugardag.

Þrátt fyrir að úrslit leiksins hafi verið afgerandi voru Skagakonur nokkuð lengi að brjóta ísinn. Þær virtust taugatrekktar framan af fyrri hálfleik og fyrsta markið kom ekki fyrr en á 44. mínútu. Það skoraði Ruth Þórðar Þórðardóttir eftir hornspyrnu og ÍA leiddi með einu marki gegn engu í hléinu.

Skagakonur komu ákveðnar til síðari hálfleiks og virtust mun yfirvegaðri inni á vellinum en í fyrri hálfleik. Þær juku forskot sitt á 52. mínútu og aftur eftir hornspyrnu. Ruth Þórðar skallaði hornspyrnuna aftur inn í teiginn á Unni Ýr Haraldsdóttur sem kom boltanum í netið.

Unnur Ýr var aftur á ferðinni eftir klukkustundar leik þegar hún skoraði með góðu skoti. Skagakonur komnar í 3-0 en hvergi nærri hættar. Það sem eftir lifði leiks réðu þær lögum og lofum á vellinum. Næst var komið að Aldísi Ylfu Heimisdóttur að setja mark sitt á leikinn. Hún kom inn á sem varamaður á 81. mínútu og aðeins þremur mínútum síðar skoraði hún eftir góða sendingu frá Maren Leósdóttur. Á lokamínútu leiksins bætti Aldís við öðru marki sínu eftir sendingu frá Unni Ýr. Innsiglaði hún þar með 5-0 sigur Skagamanna.

Skagakonur hafa 17. stig í 6. sæti deildarinnar, eru stigi á undan Sindra í sætinu fyrir neðan og stigi á eftir ÍR í sætinu fyrir ofan. Næst leikur ÍA gegn toppliði Selfoss á Selfossi föstudaginn 18. ágúst næstkomandi.

: Unnur Ýr Haraldsdóttir skorar annað tveggja marka sinna í leiknum. Ljósm. gbh.

Skagakonur unnu stórsigur á Hömrunum