Einn leikur fór fram í Pepsi deild karla í knattspyrnu í gærkvöldi þegar Víkingur Ó. mætti toppliði Vals á Ólafsvíkurvelli.

Leikurinn fór fjörlega af stað og bæði lið fengu ágæt tækifæri til að skora á upphafsmínútunum sem ekki tókst að nýta. Valsmenn voru nálægt því að komast yfir á 15. mínútu þegar Andri Adolphsson átti skot í þverslá. Nokkrum mínútum síðar small boltinn átti Eiður Aron Sigurbjörnsson þrumuskalla eftir hornspyrnu en aftur small boltinn í þverslánni. Heimamenn sluppu með skrekkinn en sóknarþungi Valsmanna farinn að þyngjast. Eitthvað varð undan að láta og á 24. mínútu komst Valur yfir. Haukur Páll Sigurðsson fleytti löngu innkasti áfram fyrir fætur Guðjóns Péturs Lýðssonar sem skoraði af stuttu færi.

Víkingur komst hægt og sígandi inn í leikinn eftir mark gestanna. Guðmundur Steinn Hafsteinsson féll í teig Valsmanna eftir viðskipti sín við Eið Aron og vildi fá vítaspyrnu en dómari leiksins var ekki sammála. Skömmu síðar fékk Guðmundur Steinn sannkallað dauðafæri. Eric Kwakwa átti skot af löngu færi beint fyrir fætur Guðmundar Steins sem stóð í miðjum teig Valsmanna. Hann sneri á Eið Aron en skot hans fór hárfínt framhjá marki Valsmanna. Skömmu síðar átti Víkingur laglega sókn vinstra megin á vellinum sem endaði með skoti Kwakwa. Skotið var gríðarlega fast en fór rétt framhjá markinu.

Víkingar sterkari aðilinn í leiknum og þeir jöfnuðu á 38. mínútu. Christian Martinez sparkaði frá markinu og langt fram völlinn. Eiður Aron leyfði boltanum að skoppa fyrir framan sig sem varð til þess að Guðmundur Steinn hirti einfaldlega boltann og lagði hann framhjá markverðinum. Fleiri mörk voru ekki skoruð í fyrri hálfleik og staðan því 1-1 í hléinu.

Valsmenn byrjuðu seinni hálfleikinn af krafti og náðu forystunni að nýju strax á 49. mínútu leiksins. Eftir sókn upp vinstri kantinn var boltinn lagður fyrir markið. Boltinn fór af varnarmanni Víkings og féll þaðan fyrir fætur Patricks Pedersens sem hamaraði hann upp í samskeytin. Vel afgreitt hjá Pedersen.

Leikmenn Víkings reyndu að svara fyrir sig og áttu nokkrar álitlegar sóknir en tókst ekki að gera sér mat úr þeim. Leikurinn róaðist heldur eftir því sem leið á. Valsmenn vildu fá vítaspyrnu á 75. mínútu og virtist sem dómari leiksins ætlaði að blása í flautuna en hann hætti við og ekkert dæmt. Guðmundur Steinn átti skömmu síðar skot úr þröngu færi sem var varið áður en Pedersen skaut í stöng eftir góðan undirbúning Dions Acoffs.

Hvorugu liðinu tókst að skapa sér afgerandi færi það sem eftir lifði leiks og það voru því Valsmenn sem fóru með sigur af hólmi í Ólafsvík, 1-2.

Víkingur situr eftir leikinn í 10. sæti deildarinnar með 13 stig, tveimur stigum á undan ÍBV í en stigi á eftir KR, sem á leik til góða í sætinu fyrir ofan. Víkingur og KR mætast einmitt í næstu umferð. Sá leikur fer fram í Reykjavík mánudaginn 31. júlí næstkomandi.

Víkingur tapaði fyrir toppliðinu