Víkingur Ó. vann frækinn sigur á Íslandsmeisturum FH þegar liðin mættust í Kaplakrika í Hafnarfirði á föstudagskvöld.

Nokkuð jafnræði var með liðunum í fyrri hálfleik en leikurinn nokkuð bragðdaufur. Hvorugu liðinu tókst að skapa sér ákjósanleg marktækifæri og fyrir vikið var markalaust þegar flautað var til hálfleiks.

En það átti eftir að breytast. Síðari hálfleikur var ekki gamall þegar FH-ingar fengu sannkallað dauðafæri. Þórarinn Ingi Valdimarsson sendi boltann fyrir á Halldór Orra Björnsson, en Christian Martinez var kominn út úr marki Víkings. Halldór stóð því einn á auðum sjó, með opið markið fyrir framan sig en þrumaði boltanum framhjá.

Aðeins tveimur mínútum síðar vildu leikmenn Víkings fá vítaspyrnu þegar Kwame Quee féll í teignum en dómari leiksins sá ekkert athugavert við atvikið.

Það var síðan á 56. mínútu að fyrsta mark leiksins leit dagsins ljós. FH-ingum gekk brösulega að koma fyrirgjöf Víkings frá. Boltinn féll fyrir fætur Kenans Turudija sem lét vaða af löngu færi, beint í hornið fjær. Glæsilegt mark og Víkingur kominn með forystuna.

Heimamenn í FH gerðu tvöfalda skiptingu strax eftir markið og hugðust svara strax fyrir sig. Þeir juku sóknarþungann. Guðmundur Karl Guðmundsson átti gott skot frá vítateigslínunni sem Martinez varði vel í horn en þess utan gáfu Víkingar fá færi á sér. Gestirnir voru þéttir til baka og biðu færis.

Á 79. mínútu komst Víkingur í góða skyndisókn. Kenan Turudija geystist upp vinstri kantinn og heimamenn voru fáliðaðir til baka. Kenan sendi boltann á Guðmund Stein Hafsteinsson sem var aleinn á auðum sjó í vítateig FH-inga. Hann hafði nægan tíma og átti ekki í neinum vandræðum með að leggja boltann í netið framhjá Gunnari Nielssen í markinu. Víkingur kominn tveimur mörkum yfir og stutt eftir af leiknum.

Stuttu eftir markið fengu FH-ingar gott færi. Steven Lennon átti þá góðan skalla eftir fyrirgjöf Atla Guðnasonar sem Martinez varði meistaralega í marki Víkings. Ólsarar þéttu vörnina enn frekar það sem eftir lifði leiks og heimamenn komust lítt áleiðis. Það fór því að lokum svo að Víkingur hafði sigur á FH með tveimur mörkum gegn engu. Óvæntur sigur en sannarlega verðskuldaður.

Með sigrinum lyfti Víkingur sér upp úr fallsæti, núna 10 stig í 10. sæti deildarinnar. Næst leikur Víkingur mánudaginn 17. júlí næstkomandi þegar liðið tekur á móti ÍA í Ólafsvík.

Víkingar unnu frækinn sigur á FH