Berglind Ragnarsdóttir í brautinni en hún vann fyrsta mótið sem var í fjórgangi um daginn og leiðir því í keppninni. Ljósm. Gunnhildur Birna Björnsdóttir.

Tvö laus pláss í Vesturlandsdeildinni í hestaíþróttum

Stjórn Vesturlandsdeildarinnar í hestaíþróttum auglýsir laus til umsóknar tvö liðspláss í deildinni á komandi tímabili, veturinn 2017. Vesturlandsdeildin er einstaklings- og liðakeppni í hestaíþróttum en 24 knapar mynda sex, fjögurra manna lið sem etja kappi í sex greinum hestaíþrótta á fimm kvöldum í febrúar og mars. Hvert lið sendir þrjá keppendur til leiks í hverja grein og telja allir til stiga í liðakeppninni en tíu efstu hljóta stig í einstaklingskeppninni. Keppnisgreinar á komandi tímabili verða: Fjórgangur,  fimmgangur, tölt, slaktaumatölt, gæðingafimi og flugskeið.

„Eins og fyrr segir standa liðin saman af fjórum keppendum sem allir skulu búsettir og/eða starfandi á Vesturlandi og hafi náð 18 ára aldri (árið telur). Umsóknir berist á netfangið vesturlandsdeild@gmail.com í síðasta lagi 31. júlí 2016. Með umsókninni þurfa að fylgja upplýsingar um þrjá liðsmenn og tilgreina skal einn þeirra sem liðsstjóra. Frestur til að skila inn fjórða liðsmanni og þar með fullskipuðu liði er 1. nóvember 2016. Sækjist fleiri en tvö lið eftir plássum í deildinni verður haldin úrtaka um lausu sætin á haustmánuðum,“ segir í tilkynningu frá stjórn Vesturlandsdeildarinnar.

Líkar þetta

Fleiri fréttir