Nafn: Guðveig Lind Eyglóardóttir

Hvar ertu fædd og hvenær? Í Reykjavík 1. mars 1976. Mamma náði að halda mér inni rétt fram yfir miðnætti svo ég myndi ekki fæðast 29. febrúar.

Hvernig myndir þú lýsa þér í þremur orðum? Sterk, yfirveguð, mannþekkjari.

Áttu gæludýr? Hundinn Kasper sem stefnir að því að vera köttur.

Hvers saknarðu mest frá því í gamla daga? Að láta dúða mig út í vagn að sofa.

Hvað færðu þér ofan á pizzuna þína? Parmaskinku og klettasalat.

Hvað er uppáhalds nammið þitt? Kúlusúkk.

Hvaða tungumál værir þú til í að kunna? Arabísku. Ég hef frá því ég man eftir mér verið heilluð af menningu, matargerð, tónlist, hönnun og sögunni á Arabíuskaganum.

Hvað er það skemmtilegasta sem þú gerir? Að leika mér með vinkonum mínum, helst utan dyra í guðsgrænni náttúrunni eða á fjöllum. Konur sem eru ógeðslega skemmtilegar, óviðeigandi, jákvæðar, hömlulausar og kunna ekki að vera leiðinlegar.

Ertu hjátrúarfull? Já, þegar það hentar.

Hvað myndi bíómynd um þig heita? Bíddu, ég ætla að dansa.

Hver er uppáhalds mánuðurinn? Ég elska alla mánuðina á sinn hátt en þetta fer allt eftir afstöðu himintunglanna.

Hvað ertu mest hrædd við? Að lenda í árabát lífsins með tuðandi og húmorslausu fólki.

Hver er uppáhalds skyndibitinn? Engjaþykkni með vanillu og súkkulaði.

Hver er uppáhalds staðurinn þinn á Íslandi? Við stofugluggann heima hjá mér þar sem Hafnarfjallið blasir við mér.

Hver er minnisstæðasta gjöfin sem þú fékkst þegar þú varst lítil? Barbie rúm með himnasæng og bleikum silkirúmfötum. Ég fékk taugaáfall af hamingju. Sonja systir var mjög afbrýðisöm og settist á það og braut og skeindi sér svo loks með bleika silkilakinu. Við erum búnar að sættast.

Ef þú þyrftir að velja þér nýtt nafn hvað yrði þá fyrir valinu? Marsipanstykkið.

Hvað ætlaðir þú að verða þegar þú yrðir stór? Nunna. Það rann fljótlega af mér.

Vandræðalegasta augnablikið? Ég hef með árunum farið að sækjast meir í vandræðaleg augnablik, mér finnst þau skemmtileg og hressandi og legg mig fram um að búa þau til. Sérstaklega í kringum fólk sem er hégómafullt og spéhrætt.

Hvar sérðu þig eftir tíu ár? Á göngu með kampavín í bakpokanum á austurströnd Grænlands með 007.

Ertu með eina sturlaða staðreynd um þig? Ég les hugsanir fólks.

Yfirheyrslan – Les hugsanir fólks