Nafn: Stefán Broddi Guðjónsson

Hvar ertu fæddur og hvenær? Í Reykjavík, 23. júlí 1971.

Hvernig myndir þú lýsa þér í þremur orðum? Réttsýnn, hugmyndaríkur, frúin segir að ég sé þrjóskur og þrætugjarn og hún þekkir mig býsna vel. Þetta eru fjögur orð, ég á erfitt með að fylgja fyrirmælum.

Áttu gæludýr? Já, Týru loðbarn.

Hvers saknarðu mest frá því í gamla daga? Appelsín með lakkrísröri. Skil ekki af hverju ég hætti að fá mér svoleiðis eftir að ég varð fullorðinn, þarf að rifja upp þau gömlu kynni.

Hvað færðu þér ofan á pizzuna þína? Sveppi, pepperoni og rjómaost, já og mikið af osti, mjög mikið.

Hvað er uppáhalds nammið þitt? Rommkúlur og epli – ekki endilega saman. Annars fer ég í gegnum tímabil þegar kemur að nammi.

Hvaða tungumál værir þú til í að kunna? Ef það væri hægt að hlaða inn hjá mér tungumáli þá myndi ég velja kínversku. Svo hefur mig lengi langað til að kunna rússnesku. Ef ég tæki upp á því að læra tungumál í dag væri það ítalska.

Hvað er það skemmtilegasta sem þú gerir? Held ég verði að svara frekar klisjulega. Það er að upplifa árangur af fyrirhöfn eða mikilli vinnu, getur verið af ýmsum toga en frábær tilfinning.

Ertu hjátrúarfullur? Já, pínu. Ætla alla vega ekki að storka örlögunum og segjast ekki vera hjátrúarfullur.

Hvað myndi bíómynd um þig heita? Broddi skoðar heiminn.

Hver er uppáhalds mánuðurinn? Júlí. Sumarið er tíminn.

Hvað ertu mest hræddur við? Lofthræddur, en bara í fjölmenni. Svo er gott að vera guðhræddur.

Hver er uppáhalds skyndibitinn? Djúsí kjúklingabitar og harðfiskur með miklu smjöri.

Hver er uppáhalds staðurinn þinn á Íslandi? 64.900866, -20.487715 en aðalatriðið er nú félagsskapurinn.

Hver er minnisstæðasta gjöfin sem þú fékkst þegar þú varst lítill? Kötturinn Svanhildur. Góður ferðafélagi í gegnum barns- og unglingsárin.

Ef þú þyrftir að velja þér nýtt nafn hvað yrði þá fyrir valinu? Skallagrímur, tek upp það nafn þegar kollvikin eru orðin aðeins hærri.

Hvað ætlaðir þú að verða þegar þú yrðir stór? Poppstjarna, heimsfrægur leikari, leikmaður Manchester United, Nóbelsverðlaunahafi og aðalritari Sameinuðu þjóðanna, og örugglega margt fleira. Það var alveg óþarfi að dreyma litla drauma í Borgarnesi í gamla daga.

Vandræðalegasta augnablikið? Á fyrsta deiti, flottur á því og bauð Þurý út að borða. Man að mér fannst mjög vandræðalegt þegar ég fattaði að veskið gleymdist heima. 26 árum síðar erum við enn saman. Annars er maður alltaf að gera eitthvað vandræðalegt. Hef minni áhyggjur af því eftir því sem ég verð eldri.

Hvar sérðu þig eftir tíu ár? Ekki hugmynd, núvitund er málið. Vonandi sprækur, í nógu góðu standi til að geta labbað á Hafnarfjall.

Ertu með eina sturlaða staðreynd um þig? Hef sungið Doors-slagarann Light My Fire fyrir alþjóð.

Yfirheyrslan – Hef sungið Light My Fire fyrir alþjóð