medium

large

thumbnail

1536x1536

2048x2048

small

custom-size

Skagakonur unnu ótrúlegan sigur í Mjólkurbikarnum

ÞB Borg reisir glæsihýsi í Stykkishólmi

Skrifað undir við skátana í Dalabyggð

Fyrirhugaðir búferlaflutningar kannaðir á Vesturlandi

Skallagrímur úr leik eftir tap gegn Þór

Stefán Bjarki Akranesmeistari í pílu 2024

Nemendum í Fjölbrautaskóla Vesturlands á Akranesi stendur nú til boða að taka áfanga í floti og sjósundi en skólinn er fyrsti framhaldsskóli landsins að bjóða upp á slíkan áfanga. „Flot í þyngdarleysi í heitri sundlaug er einstök leið til að losa spennu úr líkama og sál. Flot skapar aðstæður fyrir djúpslökun og getur m.a. minnkað streitu, aukið sköpun, bætt einbeitingu og aukið svefngæði,“ segir í áfangalýsingunni. Áfanginn er hluti af íþróttakennslu við skólann en þær Hildur Karen Aðalsteinsdóttir og Helena Ólafsdóttir eru nú að endurskipuleggja íþróttakennsluna við skólann. Þær settust niður með blaðamanni og sögðu frá þeim breytingum sem verða gerðar á íþróttastarfi í skólanum á næstu vikum.
Slakasti áfanginn
Tímarnir í floti eru á fimmtudagskvöldum í Bjarnalaug og að sögn Hildar Karenar er aðsókn í tímana góð. „Við byrjum tímana á gera teygjur og öndunaræfingar, róa hugann og ná góðri slökun. Ég kveiki á kertum á bakkanum og svo hlustum við á slökunartónlist á meðan nemendurnir halla sér aftur og fljóta um í lauginni, sem er um 35 gráður heit, í svona 50 mínútur. Ég fer á milli þeirra og beiti ákveðinni vatnsmeðhöndlun til að hjálpa þeim að ná djúpslökun,“ útskýrir Hildur Karen. „Þetta er slakasti áfangi sem hægt er að finna,“ bætir Helena við og hlær. Sjósund hefur notið mikilla vinsælda síðustu ár og í vor þegar hlýnar aðeins í veðri mun Hildur Karen fara með nemendur niður á Langasand í sjósund. „Það eru margir að finna sig í sjósundi og áhrifum þess en áður en farið er í sjóinn þarf maður að vera meðvitaður um hætturnar þar. Við munum fara yfir þær og helstu öryggisatriði áður en við förum útí. Svo eftir smá sjósund förum við í Guðlaugu,“ segir Hildur Karen.
Breytt áhersla
Í anda heilsueflandi framhaldsskóla er nú unnið að því að nemendur öðlist færni og áhuga á að stunda hreyfingu almennt og hafi um leið frelsi til að velja sína hreyfingu „Við höfum verið með hefðbundna íþróttakennslu undanfarin ár en ákveðið var að breyta til núna,“ segir Helena um nýtt fyrirkomulag á íþróttakennslu við skólann. „Frekar en að vera alltaf í íþróttasalnum að kenna á hefðbundinn hátt reynum við frekar að gera nemendur sjálfstæðari í hreyfingu almennt svo þau geti haldið áfram að stunda hana eftir að þau hætta hjá okkur,“ útskýrir hún. „Við viljum líka ná til þeirra sem ekki eru að finna sig í hefðbundum íþróttatímum og vekja áhuga þeirra á hreyfingu sem þeim finnst skemmtileg og geta stundað áfram eftir að skólagöngu lýkur. Þau sem vilja t.d. vera í ræktinni geta þá lært undirstöðuatriðin hjá okkur, hvernig tækin virka og hvernig beita eigi líkamanum og hafa þá meiri þekkingu á sjálfstraust þegar þau fara sjálf í ræktina,“ bætir Hildur við.
Mataræði og svefn
Aðspurðar segjast þær einnig fræða nemendur um heilsusamlegan lífstíl. „Hugmyndin er að þegar þau koma í íþróttakennslu þá fái þau fræðslu um heilsu almennt. Vissulega eru þau lítið að pæla ýmsum lífsstílssjúkdómum en það kemur að því að þau þurfi að hugsa um þannig hluti og við viljum vera búin að kveikja aðeins á þeim. Við munum fræða þau um næringu, svefn, hreyfingu og bara heilbrigði almennt,“ segir Helena. „Þetta er þó allt í mótun ennþá. Við myndum vilja geta kennt þeim enn meira en við höfum þau bara í svo stutta stund,“ bætir Hildur Karen við. Þær ætla að taka þessa önn til að móta íþróttakennsluna betur og vona að næsta haust geti FVA boðið upp á íþróttakennslu eftir þessum nýju hugmyndum. „Við erum að prófa okkur áfram núna og höfum meðal annars óskað eftir hugmyndum frá krökkunum, hvað þau vilji gera og fá þau til að hugsa aðeins út fyrir boxið með okkur,“ segja þær.
Vilja hreyfa sig
Þegar bókleg kennsla við FVA fór í fjarnám vegna Covid-19 síðasta haust var ákváðið að þær Hildur Karen og Helena myndu halda áfram að hitta krakkana utandyra, innan þeirra sóttvarnatakmarkana sem voru í gildi. „Við hittumst við íþróttahúsið á Vesturgötu og gátu nemendur ráðið hvort þeir færu að ganga, hlaupa eða hjóla. Við fundum að þau voru rosalega ánægð að geta komið saman, hreyft sig og spjallað aðeins. Við fundum líka að þegar við gátum ekki hitt þau voru þau samt dugleg að fara út og hreyfa sig, þau langar flest til að hreyfa sig eitthvað,“ segja þær.
„Við þurftum að endurhugsa alla íþróttakennsluna í haust og þá varð enn ljósara mikilvægi þess að leyfa krökkunum að velja sér hreyfingu. Við erum að vinna að því í samráði við ÍA og Akraneskaupstað að bjóða upp á að nemendur fari í sjálfstæða þrektíma í ræktinni, komi í stöðvaþjálfun með okkur, fari út að hlaupa, hjóla, ganga eða bara eitthvað sem þau langar að gera, jafnvel að fara út að ganga með hundinn,“ segir Helena. „Þetta er viðkvæmur hópur sem á það til að detta alveg úr allri hreyfingu á þessum aldri og svo koma þau ekki inn aftur fyrr en kannski eftir 25 ára aldur. Við viljum koma í veg fyrir það. Við viljum fyrst og fremst að þau hreyfi sig og finni að hreyfing geri þeim gott, þá halda þau vonandi áfram að hreyfa sig út lífið,“ segja þær.

Vilja kveikja áhuga nemenda á hreyfingu