Þar mættist gamli og nýi tíminn. Tóvinna í baðstofunni og upptökubúnaður sem tekur upp efni til sýningar með sýndarveruleikagleraugum.

Tóku upp sýndarveruleikamyndband í baðstofunni

Baðstofan frá Úlfsstöðum í Hálsasveit er mikil gersemi í Safnahúsi Borgarfjarðar, en hún er miðpunktur sýningarinnar Börn í 100 ár. Þangað komu prúðbúnir gestir í síðustu viku, þær Anna Dröfn Sigurjónsdóttir og Sigrún Elíasdóttir. Erindið þeirra var að taka upp myndband í baðstofunni. Þær stöllur vinna sem fyrr að ýmsum verkefnum í sameiningu, gjarnan á sviði ullarvinnslu, handverks og/eða þjóðlegra fræða. Meðal þess sem þær hafa gert er að koma saman fram í hlaðvarpi Sigrúnar; Myrka Íslandi.

Sigrún og Anna Dröfn.

Í síðustu viku tóku þær stöllur upp kynningarefni fyrir dönsku prjónahátíðina Pakhusstrik sem haldin verður í Kaupmannahöfn nú í september. Þær útbjuggu af þessu tilefni myndræna kveðju til Dana og sýndarveruleikamyndband þannig að gestir á hátíðinni setja á sig sýndarveruleikagleraugu og eru þá staddir heima í baðstofu í tóvinnu. Þess má geta að þegar sýningin Börn í 100 ár var sett upp var Sigrún starfandi í Safnahúsinu og átti mikinn þátt í hugmyndafræði hennar. Það var svo Unnsteinn Elíasson bróðir hennar sem setti baðstofuna saman, en hún hafði áður verið tekin niður að tilhlutan Þjóðminjasafnsins árið 1974.