Það hefur alla tíð háð mér að nenna ekki að fara í göngutúra nema að hafa erindi. Finnst einhvern veginn ómögulegt að arka eitthvað út í bláinn án þess að sú gönguferð hafi áþreyfanlegan tilgang. Gekk t.d. mikið til rjúpna hér á árum áður. Í dag á ég hins vegar alveg yfirmáta erfitt með að fara að ráðum lækna sem hafa fleiri en einn reynt að sannfæra mig um að rösk hálftíma gönguferð á dag skipti sköpum við að halda líkamanum í formi, draga úr streitu, halda blóðrásinni í gangi og láta dæluna ganga eins og smurð vél. Sama hvort það er meltingarfæra,- heimils- eða hjarðalæknar, þeir segja allir það sama. Þrátt fyrir að það eitt og sér sé markmið að viðhalda og bæta heilsuna, gengur mér afleitlega að hefja þessa rútínu.

Það hljóp því sannarlega á snærið hjá mér síðastliðinn laugardag. Þannig var að þá buðu bæjaryfirvöld á Akranesi íbúum og öðrum gestum að koma á opið hús í þremur af mannvirkjum bæjarins. Þarna fékk ég því erindi til að fara í langþráðan göngutúr á næstu lóð. Vopnaður myndavél arkaði ég því af stað í frábæru veðri. Fyrst lá leiðin í splunkunýtt íþróttahús sem nefnt hefur verið eftir fyrirtæki sem ku vera býsna stórt á heimsmarkaði varahluta í flugvélar. AvAir höllin heitir húsið því. Þetta er stórt og glæsilegt hús á þremur hæðum sem rúmar allskyns íþróttir og aðskilda búningsklefa fyrir grunnskólabörn, knattspyrnufólk, körfuboltafólk og almennt þær íþróttagreinar sem stundaðar verða. Á stórum aðalvelli í húsinu geta nú 638 gestir fylgst með úr sætum þegar spilaðir verða körfuboltaleikir, nú eða handbolti, blak eða hvaðeina sem mönnum dettur í hug að iðka. Af pöllunum ofan við stúkuna getur svo annar eins fjöldi staðið og fylgst með þegar ÍA vinnur glæsta sigra í framtíðinni. Framkvæmdum er nú lokið við hús sem fullbúið kostar um 3,7 milljarða króna. Kannski finnst fólki það há upphæð, en miðað við framtíðar notkun þess og stærð bæjarfélagsins er það kannski bara býsna vel sloppið. Fermetrinn leggur sig á að giska 700 þúsund krónur, sem er vel undir fermetraverði í nýjustu íbúðunum hér í bæ.

Eftir að hafa skoðað AvAir höllina lá leiðin í gamla íþróttahúsið við hliðina. Húsið hefur nú verið gert upp og málað í Kára litunum, svart og rautt. Þar hefur verið komið fyrir miklum fjölda líkamsræktartækja frá World Class. Tæki og búnaður sem hentar vel letipúkum eins og mér sem nenna ekki í göngutúrana sína. Þarna verður í framtíðinni hægt að taka á því og svitna með öðru fólki. Það er vissulega hægt að gleðjast yfir því að búið er að stórbæta aðstöðu til íþrótta í bæ sem kennir sig einmitt við mikla íþróttaiðkun.

Þessari miðdegisgöngu minni lauk með að skoða nýuppgerða álmu Grundaskóla á samliggjandi lóð. Þarna hafa átt sér stað gríðarlegar framkvæmdir á síðustu árum sem ráðast þurfti í í flýti eftir að mygla var greind í húsinu. Í raun var allt rifið nema útveggir og byggt nýtt innvolsi og aukahæð ofan á allt saman. Ég get vottað að þarna er hvorki skipasmíðastöð né geimferðamiðstöð, eins og gárungarnir hafa staðfastlega haldið fram. Þarna fékk ég leiðsögn um neðstu hæð hússins þar sem búið er að koma fyrir aðstöðu til ólíkra list- og verknámsgreina. Þar er nú komin framúrskarandi aðstaða til hvort sem er myndlistar, heimilsfræði, tæknirými fyrir hljóð- og myndvinnslu, tónlistariðkunar og bara nefndu það. Á miðhæð eru síðan bjartar og rúmgóðar kennslustofur og kennarastofur á efstu hæð. Mér sýnist frábærlega hafa til tekist og óska skólanum og samfélaginu öllu til hamingju með áfangan.

Á heimleiðinni varð mér hugsað til þess að framundan er kosningavetur. Þegar allir „langar-að-verða“ bæjarfulltrúarnir undirbúa kosningabaráttu sína, og hverju þeir ætla að beita sér fyrir á næsta kjörtímabili, vandast hins vegar málið. Á síðustu fimm árum hefur Akraneskaupstaður nefnilega fjárfest fyrir 12-14 milljarða króna, eða svipaða upphæð og ársvelta bæjarsjóðs er. Lán hafa verið tekin fyrir flestum þessum framkvæmdum. Vandi næsta kjörtímabils verður því umfram allt sá að eyða helst sem allra minnstu og greiða niður skuldir. Kannski verður erfiðast af öllu að sætta sig við að framkvæmdagleði núverandi bæjarstjórnar náði til tveggja kjörtímabila.

Magnús Magnússon

Þurfa að bæla framkvæmdagleðina