Íþróttamaður vikunnar að þessu sinni er Davíð Andri Bragason en hann hlaut Maraþonbikar UMSB á dögunum. Davíð hljóp best í Haustmaraþoni FRÍ á síðasta ári þegar hann hljóp á tímanum 3:24:46 sem skilaði honum 3. sætinu í flokki 18-39 ára.

Nafn: Davíð Andri Bragason

Fjölskylduhagir? Ég er trúlofaður Elvu Björk og við eigum saman synina Aron Ými 4 ára og Hinrik Val 2 ára.

Hver eru þín helstu áhugamál? Fyrir utan hlaupin eru það ferðalög með vinum og fjölskyldu, veiði og svo hef ég alltaf gaman að fótboltanum.

Hvernig er venjulegur dagur hjá þér um þessar mundir? Ég er heima með yngri son minn þangað til hann byrjar í leikskóla í febrúar. Ég reyni að að fara út að hlaupa áður en konan fer að vinna. Svo bara sinni ég drengnum, förum í sund eða út að leika, eitthvað til að brenna orkunni hjá litla áður en ég sæki eldri strákinn. Þá tekur við þessi týpíska seinniparts rútína að elda kvöldmat, ganga frá og koma strákunum í háttinn.

Hverjir eru þínir helstu kostir og gallar? Minn helsti kostur er örugglega hvað ég er með gott jafnaðargeð. Ég reyni að gera gott úr hlutunum og horfa á það jákvæða. Hvað varðar galla þá er ég frekar hvatvís og mætti oft vera búinn að skipuleggja mig betur.

Hversu oft æfir þú í viku? Ég æfi svona 5-6 sinnum í viku. Ég reyni að gera eitthvað smá á hverjum degi, hvort sem það sé að hlaupa eða taka heima æfingu.

Hver er þín fyrirmynd í íþróttum? Mín helsta fyrirmynd í íþróttum er Steven Gerrard eða Xabi Alonso. Ég lít einnig mikið upp til margra hlaupara.

Af hverju valdir þú hlaup? Ég byrjaði að hlaupa af einhverju viti í Covid. Það hentaði líka vel minni rútínu að geta bara hent sér út og þurfa ekki að fara í einhvern tíma eða líkamsræktarsal. Svo er ég mikill keppnismaður og finnst gaman að skrá mig í hlaup. Það hvetur mig til að æfa reglulega og svo er alltaf gaman að bæta tímana. Svo hef ég fengið mjög mikinn stuðning og hvatningu frá fjölskyldunni en Elín mamma mín hefur verið mikið að hlaupa og hún gaf mér miða í fyrsta hlaupið mitt. Það er einnig gaman að vera partur af hlaupahópunum Flandra og Irish.

Hver er fyndnastur af þeim sem þú þekkir? Strákarnir í hlaupahópnum Irish á Akranesi koma mér alltaf til að hlæja.

Hvað er skemmtilegast og leiðinlegast við þína íþrótt? Það skemmtilegasta við hlaupin er hvað þau geta verið fjölbreytt. Utan- og innanvega, sprettir og langhlaup. Alltaf gaman að hlaupa í góðum félagsskap en líka gott að vera einn og hreinsa hugann. Það leiðinlegasta er þegar maður lendir í því að nenna ekki að fara út að hlaupa og það er enginn nema maður sjálfur til að drífa mann áfram.