medium

large

thumbnail

1536x1536

2048x2048

small

custom-size

Úr sarpi – Vigfús fagnar aldarafmæli sínu eftir rétta viku

Óformleg skoðun á sameiningu Dala og Húnaþings vestra

Hafsteinn gaf tónlistarskólanum safn bóka

Jólabókaflóð í Samkomuhúsinu í Grundarfirði

Rithöfundar komu í heimsókn í Brekkó

Gera ráð fyrir góðum rekstrarafgangi og lækkun skulda árið 2025


<h2>„Það eina sem ég kunni var að elda en svo heppnaðist bara allt lygilega vel“</h2>



<figure class="wp-block-embed is-type-rich is-provider-soundcloud wp-block-embed-soundcloud"><div class="wp-block-embed__wrapper">
<div class="iframe-wrapper"><iframe title="15. Skinkuhorn - Lilja Hrund Jóhannsdóttir by Skinkuhorn Skessuhorns" width="900" height="400" scrolling="no" frameborder="no" src="https://w.soundcloud.com/player/?visual=true&#038;url=https%3A%2F%2Fapi.soundcloud.com%2Ftracks%2F1430426110&#038;show_artwork=true&#038;maxheight=1000&#038;maxwidth=900&#038;secret_token=s-OVO4SaNgEox"></iframe></div>
</div></figure>



<p>Lilja Hrund Jóhannsdóttir er viðmælandi Skinkuhornsins þessa vikuna. Hún er Rifsari í húð og hár og hefur búið þar allt sitt líf, að frátöldum námsárum í Reykjavík. Nú á síðasta ári keyptu hún og maður hennar, Benedikt Gunnar Jensson, hins vegar hús í Ólafsvík og hafa þar skapað sér heimili en Lilja gengur nú með þeirra fyrsta barn og er von á því í heiminn á allra næstu dögum. Lilja er matreiðslumeistari og á og rekur veitingastaðinn Sker í Ólafsvík ásamt eldri bróður sínum, Arnari Laxdal Jóhannssyni. Sker opnaði 2. júní 2018, hálfu ári eftir að Lilja útskrifaðist sem matreiðslumaður frá Menntaskólanum í Kópavogi.</p>



<p>„Þetta var ekki mín hugmynd!“ segir Lilja hlæjandi, aðspurð um aðdraganda þess að Sker varð að veruleika. „Við erum rosalega virk, við fjölskyldan, og þetta húsnæði sem er gamli sparisjóðurinn hafði verið til sölu lengi í Ólafsvík. Og áður en ég vissi af var fjölskyldan mín búin að kaupa húsnæðið og ákveða, eða við ákváðum okkar á milli að við ætluðum að opna veitingastað. Arnar stóri bróðir minn er með svakalega virkar hugmyndir og getur verið alveg rosalega virkur þannig hann er í rauninni sá sem á frumkvæði að þessu öllu saman. Það var þá bara tekin ákvörðun um að gera þetta,“ segir Lilja. Hún útskrifaðist úr náminu í desember 2017 og var þá með vinnu á veitingastaðnum Vox sem staðsettur er á hótel Hilton í Reykjavík. Eftir útskrift hélt hún áfram að vinna þar á meðan bróðir hennar og foreldrar unnu að því að standsetja húsnæðið í Ólafsvík svo það myndi henta fyrir veitingastað. Þar hafði áður verið sparisjóður svo það þurfti mörgu að breyta, t.a.m. þurfti að brjóta niður peningahvelfinguna þar inni og segir Lilja að það eitt hafi tekið um tvær vikur. Þá var heldur ekkert eldhús í húsinu og var Lilja með umsjón yfir því að hanna eldhúsið og koma því upp. Í maíbyrjun hætti hún svo á Vox og flutti aftur heim á Rif til foreldra sinna.</p>



<h2>Nýútskrifuð að opna veitingastað</h2>



<p>„Ég vissi eiginlega ekkert hvað ég var að fara að gera. Nýútskrifuð og að fara að opna veitingastað í Ólafsvík. Það eina sem ég kunni að gera var að elda en þarna voru komnir fullt af öðrum þáttum. Það hvernig ég átti að setja eldhúsið saman og hvernig væri best að gera ákveðna hluti. En af því ég vann enn þá á Vox til að byrja með þá gat ég spurt kollega mína þar hvernig væri best að gera þetta allt saman og svo heppnaðist þetta bara allt saman ótrúlega vel. Eiginlega bara lygilega vel,“ segir Lilja. Hún hafði um tíu daga eftir að eldhúsið var klárt til að hanna matseðil og æfa sig að elda þá rétti sem í boði voru áður en veitingastaðurinn opnaði. „Ég var að gera pizzur og alls konar á matseðli sem ég hafði aldrei gert áður. En ég hafði þarna tíma til að æfa mig áður en við opnuðum. Svo var bara fullt hús á opnuninni, það var sjómannadagshelgi og þetta var bara algjört bíó,“ segir Lilja og brosir. Þá helgi og fyrstu dagana og vikurnar voru það aðallega hún og fjölskylda hennar sem stóðu vaktina á veitingastaðnum, hvort sem það var frammi í sal eða inni í eldhúsi. „Mamma, mágkonur mínar og bræður mínir voru svona mest frammi í sal, pabbi var að sendlast og var líka aðaluppvaskarinn en svo var ég líka búin að fá nokkra vini mína sem voru með mér í náminu og að vinna á VOX til að koma og vera með mér og þau skiptust á að gera það,“ segir Lilja sem fastréði samt engan kokk með sér. „Ég ætlaði að sigra heiminn. Ég veit ekki alveg hvernig ég ætlaði að vinna alla þessa vinnu en ég vann þarna í fjóra mánuði án þess að taka mér frí fyrst. Og þá var ég gjörsamlega búin, það var opið alla daga og ég stóð kokkavaktina. Eftir fjóra mánuði réði ég svo annan kokk á móti mér en það er rosalega stutt síðan ég minnkaði við mig vinnu af einhverju viti. Og það er bara af því ég hafði og hef svo rosalega mikinn metnað fyrir því sem ég er að gera og vil vera að vinna.“</p>



<p>Í dag eru 10-15 starfsmenn yfir vetrartímann á Sker en á sumrin telja þeir þrjátíu. Fyrir tveimur árum færði Sker út kvíarnar og keypti bjálkahúsið sem staðsett er á móti Sker, á horni Ólafsbrautar og Grundarbrautar, þar sem áður var veitingastaðurinn Hraun. Þar reka þau núna veitingastaðinn Reks sem opinn er yfir sumarmánuðina. „Þá stækkaði einhvern vegin allt. Það er mikið að gera á Skerinu allan ársins hring í hópum og ég er líka með mikið af veislum, brúðkaup, þorrablót og árshátíðirnar. Ég var einhvern veginn rosalega gráðug og tók að mér allt sem ég gat gert af því ég hafði svo miklar áhyggjur af þessum vetrarmánuðum og því að ég myndi ekki lifa þá af,“ segir Lilja sem var þá komin með allt á herðarnar. Þetta er í fyrsta sinn sem hún sér ekki um matinn á þorrablótunum í Snæfellsbæ en það er reyndar önnur góð og gild ástæða fyrir því.</p>



<h2>Að sleppa takinu</h2>



<p>Á síðustu vikum og mánuðum hefur Lilja þurft að læra að deila verkefnum, en hún hefur alltaf haft þá tilhneigingu að gera alla hluti sjálf. „Ég er alltaf að sleppa takinu meira og meira en er samt alveg enn þá með puttana ofan í öllu. Ég ætla nú að reyna að njóta svona allavega fyrsta mánuðinn í fæðingarorlofinu án þess að þurfa að vinna en það er bara þannig þegar þú ert í eigin rekstri að þú ert aldrei í fríi. En ég vona að ég fá nú frið á meðan ég kem barninu í heiminn en svo kemur hitt bara í ljós. Ég er náttúrulega núna að fara að læra inn á nýtt hlutverk þar sem það þarf einhver annar á mér að halda en Sker. Ég geri mér því eiginlega enga grein fyrir því hvað ég verð að gera til dæmis eftir þrjá mánuði en vona að við litli getum fundið út úr þessu saman. Fundið eitthvað mynstur sem hentar okkur. Svo er ég núna flutt í Ólafsvík og ég sé niður á Sker út um eldhúsgluggann heima, ég veit ekki hvort það sé gott eða slæmt,“ segir Lilja og hlær.</p>



<p>Í Skinkuhorni vikunnar segir Lilja einnig frá því hvað varð til þess að hún ákvað að læra matreiðslumanninn, lýsir fordómum sem hún varð fyrir vegna þess að hún fór ekki í hefðbundið háskólanám og einnig fordómum sem leynast innan starfsstéttarinnar sem er heldur karllæg. Lilja tók líka þátt á markaðsátakinu Kvennastarf, þar sem markmiðið er að hvetja fólk til að láta ekki samfélagsleg kynhlutverk aftra sér í að læra og vinna við það sem það vill.<br>Kraftmikil og dugleg kona sem hefur frá mörgu að segja.</p>



<p>Þátturinn er aðgengilegur hér á vef Skessuhorns og á Spotify.</p>


Skinkuhorn – Lilja Hrund Jóhannsdóttir