Tónlistin flæðir í fjölskyldunni

Karítas Óðinsdóttir frá Einarsnesi í Borgarfirði hefur getið sér gott orð í tónlistarsenunni á Íslandi en hún starfar sem plötusnúður og söngkona. Einnig hefur hún verið meðlimur stúlknarappsveitarinnar Reykjavíkurdætra síðan árið 2018 og keppti m.a. með sveitinni í Söngvakeppni Sjónvarpsins á síðasta ári þar sem litlu munaði að hópurinn keppti fyrir Íslands hönd í Eurovision 2022. Karítas er viðmælandi Skinkuhorns þessa vikuna og spjallar þar m.a. um æskuna, vegferð sína inn í tónlistarheiminn, hvernig hún varð óvart eftirsóttur plötusnúður undir nafninu DJ Karitas og tíma sinn með Reykjavíkurdætrum.

Tónlistarfjölskylda
Karítas segist vera mikið sveitabarn en hún er yngst í átta systkina hópi. ,,Flest höfum við systkinin verið á einhverjum tímapunkti í tónlist. Maður var umkringdur tónlist sem krakki. Það er mikil tónlist í fjölskyldunni hans pabba og mamma er líka lærð óperusöngkona. Amma var líka þekkt söngkona í sinni tíð og söng m.a. lagið „Það er draumur að vera með dáta.“ Þannig að tónlistin flæðir í minni fjölskyldu má segja,“ segir Karítas.

Fyrsti skóladagurinn
Karítas var í Varmalandsskóla í 1.-7. bekk grunnskóla þar sem hún keyrði 40 mínútur í skólarútu aðra leið til skóla. Þegar kom á unglingastig færði hún sig í Grunnskólann í Borgarnesi þar sem aðeins var fimm mínútna akstur í skólann. ,,Ég byrjaði mína skólagöngu í Varmalandsskóla og á mjög hlýjar og góðar minningar þaðan og man einmitt sérstaklega vel eftir fyrsta skóladeginum meira að segja,“ segir Karítas sem greinir betur frá fyrsta skóladeginum í Skinkuhorni vikunnar.

Tónlistarnámið
Karítas byrjaði snemma í tónlistinni en hún var fjögurra ára þegar hún hóf nám í fiðluleik við Tónlistarskóla Borgarfjarðar. ,,Ég fór í Suzukinám í fiðlu og lærði þar þangað til ég varð ellefu ára. Svo fékk ég smá gelgjukast og hætti, sem ég dauðsé eftir í dag. Svo sagði mamma við mig að ég þyrfti að læra á eitthvað annað hljóðfæri ef ég ætlaði að hætta á fiðlu. Þá fór ég að læra á píanó og lærði á það í tvö ár. Þá langaði mig aftur að hætta og skipti yfir á gítar. Í dag bý ég að þessum grunni á nokkur hljóðfæri og er mjög þakklát fyrir að mamma var svolítið hörð við mig og hvatti mig til að læra á hljóðfæri.

Ég á líka einhverja kjarnaminningu af mér þegar ég var sex ára og að læra á blokkflautu. Þá sat ég á gólfinu heima með tvær blokkflautur uppí mér og spilaði Gamla Nóa á vinstri og raddaði með hægri. Mamma horfði á mig eins og ég væri einhver geimvera,“ segir Karítas og hlær.

Aftur í ræturnar
Auk hljóðfæranámsins stundaði Karítas nám við Sönglist í Borgarleikhúsinu. ,,Ég fór á nokkur námskeið hjá Sönglist í Borgarleikhúsinu þegar ég var í Varmalandsskóla. Þá var ég keyrð tvisvar sinnum í viku á þessi námskeið. Við vorum tvær vinkonur sem fórum saman og mömmurnar voru þá að skiptast á að skutla okkur. Það var mjög skemmtilegt og ég tek helling með mér þaðan. Við lærðum söng, leiklist og dans og í lok hverrar annar var fluttur lítill söngleikur með dansatriðum, það var æðislegt,“ segir Karítas.

,,Ég var svo alltaf að taka þátt í karókíkeppnunum í Óðali. Mig minnir að ég hafi unnið einhvern tímann með lagið Vetrarsól. Svo þegar ég var í 10. bekk tók ég mjög metnaðarfullt lag með Christina Aguilera. Svo keppti ég líka í söngkeppninni sem fylgdi Æskulýðsballinu man ég. Ég var einmitt að dæma þá söngkeppni í fyrra og fékk líka að vera plötusnúðurinn á ballinu, þannig að ég fór þarna beint aftur í ræturnar sem var rosalega gaman,“ segir Karítas.

Hægt er að hlusta á þáttinn í heild sinni í spilaranum hér fyrir neðan.

Skinkuhorn – Karítas Óðinsdóttir