medium

large

thumbnail

1536x1536

2048x2048

small

custom-size

Viðhorf íbúa á Vesturlandi til ferðamanna og ferðaþjónustu

Kári með aðra höndina á titlinum eftir stig gegn Augnabliki

Mættur á rakarastofuna að morgni 90 ára afmælisdagsins

Víkingur missti af gullnu tækifæri eftir jafntefli gegn Ægi

Vetrarveður norðan heiða og færð gæti spillst

Boða til mótmæla á Austurvelli á morgun


<h2>„Ég var bara með þá hugmynd að skrifa bók“</h2>



<p>Viðmælandi vikunnar í hlaðvarpsþættinum Skinkuhorni er metsöluhöfundurinn Eva Björg Ægisdóttir. Í lok síðasta árs kom út fimmta skáldsaga hennar en hún hefur getið sér gott orð sem glæpasagnahöfundur. Bækur hennar hafa komið út í fimmtán löndum, nú síðast í Eþíópíu og þar með hafa komið út bækur eftir hana í öllum heimsálfum. Eva segir það ekki alltaf hafa legið fyrir að verða rithöfundur þó hún sé bókhneigð og þyki gaman að skrifa. „Það er líka kannski ekki eitthvað sem maður getur ákveðið, að verða rithöfundur að aðalstarfi. Það er svolítið undir öðrum komið, þ.e. hvort fólk kaupi bækurnar þínar.“</p>



<h2>Hélt dagbækur í mörg ár</h2>



<p>Ég byrjaði snemma að lesa og var strax í fyrsta bekk komin með stórar bækur og fór ekki í þessar léttlestrarbækur eins og samnemendur mínir. Þannig það var alltaf svolítið mitt, að lesa. Samhliða því byrja ég aðeins að reyna að skrifa sjálf. Ég man eftir því þegar ég var svona 7-8 ára þá var ég að reyna að skrifa sögur í stílabækur en svo á ég alveg bara útfylltar dagbækur frá þeim tíma. Þetta eru örugglega um 9-10 dagbækur sem er kannski ákveðinn grunnur að því að ég fór svo að skrifa meira. Ég var eins og margir aðrir krakkar að lesa Dagbækur Berts þannig að mínar dagbækur litast af því, þær eru færðar í stílinn og ég skrifaði ljóð og gaf mér mjög skáldlegt leyfi á mitt líf,“ segir Eva Björg og hlær. „Ég hélt þessu áfram mjög lengi, alveg fram eftir unglingsárunum og ég þori alls ekki að lesa þetta aftur. Kannski ég lesi dagbækurnar þegar ég verð orðin gömul kona, þá verður þetta orðið nógu fjarlægt. Mér myndi finnast mjög óþægilegt að lesa margt þarna í dag af því þetta er mjög persónulegt. En kannski gaf þetta manni eitthvað, allavega smá æfingu þótt þessi skrif muni aldrei birtast á prenti.“</p>



<h2>Þeir sem skipuleggja ekki neitt</h2>



<p>Eva er fædd á Akranesi árið 1988 og bjó þar í 25 ár. Hún býr nú í Vesturbæ Reykjavíkur ásamt manni sínum og þremur börnum og er byrjuð að skrifa sína sjöttu skáldsögu. Fyrsta skáldsaga hennar, Marrið í stiganum, kom út vorið 2018 og hlaut mikið lof. Bókina skrifaði Eva á níu mánuðum samhliða því að hún vann sem flugfreyja hjá WOW air. „Ég var bara með þá hugmynd að skrifa bók en ég vissi ekkert hvernig bók, og ekkert endilega glæpasögu. Og ég vissi ekkert hvar ég átti að byrja. Eina hugmyndin sem ég var með var lík við vitann á Akranesi og ég vann í kringum það,“ segir Eva og heldur áfram. „Það eru til tvenns konar höfundar, það eru þeir sem skipuleggja og þeir sem skipuleggja ekki neitt og ég fell alveg þar undir, ég skipulegg ekki neitt. Það er smá vesen þegar maður er að gera ráðgátu þar sem þú þarft að vera með ákveðin púsl sem passa saman og þú þarft að planta vísbendingum. Ég vinn þetta allavega svolítið úti um allt.“</p>



<h2>Ég er búin að skrifa bók</h2>



<p>Eva sagði manninum sínum snemma frá því þegar hún var búin að ákveða að skrifa bók en hún sagði engum öðrum frá því. „Ég vildi ekki vera að auglýsa það úti um allt að ég væri að skrifa bók og svo kæmi kannski engin bók. Mig langaði frekar að segja við foreldra mína: „Ég er búin að skrifa bók, hérna er hún!“ og það var það sem ég gerði. Ég var þarna að vinna sem flugfreyja og það voru kannski bara átta vaktir á mánuði. Þá hafði ég ágætis tíma á virkum dögum til þess að vinna að bókinni og gerði það.“ -Varstu þá svolítið skipulögð? „Já ég var það þarna. Ég merkti inn í dagbók að ég ætlaði að skrifa tvö þúsund orð á dag og var búin að ákveða eftir hvern mánuð hve mörg orð ég ætlaði að vera búin að skrifa. Og það virkaði vel fyrir mig og ég skrifaði fyrstu bókina á níu mánuðum, eða þá var fyrsta uppkast tilbúið. Svo er þetta ferli töluvert lengra þegar þú ert að skrifa bók í fyrsta skipti. Þá þarf að hafa samband við útgefanda og allt það.“</p>



<h2>Tímasetning</h2>



<p>Eva sendi uppkastið að bókinni í keppnina um Svartfuglinn sem voru þá ný glæpasagnaverðlaun á Íslandi fyrir nýja höfunda. Það eru Yrsa Sigurðardóttir og Ragnar Jónasson sem stofnuðu til verðlaunanna í samvinnu við Veröld bókaútgáfu. Eva skrifaði þó ekki bókina fyrir keppnina heldur vildi svo vel til að þegar fyrsta uppkast var svo gott sem tilbúið fékk hún veður af Svartfuglinum. „Ég sendi fyrsta uppkastið á Veröld og þeir bentu mér á þessa keppni. Þannig ég vissi ekki af keppninni þegar ég var að skrifa en þessi tímasetning hentaði auðvitað mjög vel. Ég held ég hafi sent uppkastið á Veröld sumarið 2017 og þá var frestur fram í september til að senda inn uppkast í Svartfuglinn.“ Bókin kom svo út vorið 2018 og segir Eva Björg það hafa verið mjög góðan tíma fyrir nýjan rithöfund til að gefa út sína fyrstu bók en margar bækur eigi það til að týnast í t.d. jólabókaflóðinu. Með því að vinna keppnina um Svartfuglinn fékk Eva bók sína útgefna hjá Veröld auk peningaverðlauna. Þá bauðst henni samningur við breskan umboðsmann að nafni David Headley en hann hefur verið útnefndur sem einn af hundrað áhrifamestu mönnum breskrar bókaútgáfu. „Það breytti rosalega miklu fyrir mig að fá hann með mér og það gerði það að verkum að ég fékk mjög fljótt útgáfu erlendis sem er í raun grundvöllur þess að geta unnið sem rithöfundur á Íslandi,“ segir Eva Björg Ægisdóttir í Skinkuhorni vikunnar.&nbsp;</p>



<p>Hægt er að hlusta á þáttinn í heild sinni hér á <em>skessuhorn.is</em> og á <em><a href="https://open.spotify.com/episode/11hRngbyUuRK6cFy9nAiZW">Spotify</a>.</em></p>



<figure class="wp-block-embed is-type-rich is-provider-soundcloud wp-block-embed-soundcloud"><div class="wp-block-embed__wrapper">
<div class="iframe-wrapper"><iframe title="18. Eva Björg Ægisdóttir by Skinkuhorn Skessuhorns" width="900" height="400" scrolling="no" frameborder="no" src="https://w.soundcloud.com/player/?visual=true&#038;url=https%3A%2F%2Fapi.soundcloud.com%2Ftracks%2F1456954795&#038;show_artwork=true&#038;maxheight=1000&#038;maxwidth=900"></iframe></div>
</div></figure>


Skinkuhorn – Eva Björg Ægisdóttir