Langlundargeð og dass af nördisma mikilvægir eiginleikar í háskólastarfinu

Bjarki Þór Grönfeldt Gunnarsson er frá bænum Brekku í Norðurárdal í Borgarfirði og gekk því í grunnskóla í Varmalandi og hélt þaðan til náms við Menntaskóla Borgarfjarðar. Í framhaldinu tók við nám í sálfræði við Háskólann í Reykjavík ásamt meistara- og doktorsgráðu við University of Kent í Bretlandi. Hann er í dag doktor í stjórnmálasálfræði og starfar við Háskólann á Bifröst þar sem hann vinnur rannsóknarstarf í byggða- og sveitarstjórnarmálum. Bjarki Þór er viðmælandi Skinkuhornsins þessa vikuna.

Gott samfélag í Kent
,,Þegar maður fer út í doktorsnám halda margir að maður geri ekkert annað en að vinna en það var heldur betur ekki þannig. Ég var svo heppinn að lenda í góðu samfélagi þar sem ég eignaðist fullt af vinum en félagslífið í skólanum var litríkt og ég kynntist fólki alls staðar að úr heiminum. Ég bjó alltaf með þremur öðrum og það er reynsla sem ég hefði ekki viljað fara á mis við. Ég var líka svo heppinn að fá að ferðast mikið með náminu. Ég fór á ráðstefnur í Bandaríkjunum, Þýskalandi, Frakklandi, Gikklandi, Portúgal og Spáni svo eitthvað sé nefnt. Þetta var ofboðslega skemmtilegur tími,“ segir Bjarki Þór í Skinkuhorni vikunnar.

Konunglegur talsmáti
Aðspurður segir Bjarki Þór enskuna og drykkjumenninguna hafa komið hvað mest á óvart þegar hann flutti til Bretlands. ,,Þegar ég fór út hélt ég að ég talaði rosalega góða ensku en það var ekki raunin. Þarna tala allir konunglega ensku svo maður var fljótur að fatta að enskuþekkingin var svolítið grunn. Svo var drykkjumenningin frábrugðin því sem ég þekkti fyrir en þarna var alltaf í boði að drekka, eitthvað sem tíðkast ekki á Íslandi. Það voru allir alltaf tilbúnir að fara á pöbbinn eftir vinnu en fólk horfði bara á úrið og beið eftir að klukkan yrði fjögur, þetta kom mér mjög breskt fyrir sjónir,“ segir Bjarki og hlær.

Vinnur að rannsókn um Incel
Í framhaldi af doktorsnáminu vinnur Bjarki nú að sínum eigin rannsóknum og fræðigreinum. ,,Stærsta rannsóknarverkefnið sem ég er að vinna í dag út frá doktorsritgerðinni er tengt Incel sem er netfyrirbrigði. Incel stendur fyrir involuntary celibate eða skírlífur gegn vilja sínum, þetta eru þá aðallega ungir menn sem eru á spjallborðum og sameinast um stakt kvenhatur. Þetta er mjög flókið en djúpt sálfræðilegt viðfangsefni. Þeir líta á að öll þeirra vandamál séu konum að kenna, hópurinn trúir á það að feminismi sé samsæri gegn karlmönnum. Það er hægt að nota netið til alls og ýmsir skrítnir staðir til í þeim heimi. Það er fullt af frábærum upplýsingum á netinu og hægt að leita þar stuðnings með ýmislegt, en þegar fólk er á slæmum stað í sínu lífi er kannski auðvelt að detta inn á staði þar sem er verið að bjóða upp á einföld svör við flóknum spurningum. Í þessum tilvikum leita ungir strákar á netið og fá þau svör að konur séu að vinna gegn þeim. Þegar þú ert ungur og áttaviltur ertu kannski móttækilegri fyrir þessum upplýsingum. Rannsóknarverkefnið mitt snýr sem sagt að forvörnum gegn þessu,“ segir Bjarki Þór.

Háskólastarfið fjölbreytt
Auk þess að vinna að eigin rannsóknum starfar Bjarki við rannsóknarsetur við Háskólann á Biföst. ,,Ég var svo heppinn að fá vinnu við Háskólann á Bifröst um leið og ég flutti heim. Mitt aðalverkefni er að vinna rannsókn við nýstofnað rannsóknasetur í byggða- og sveitarstjórnarmálum. Þar vinn ég með Vífli Karlssyni en við erum með nokkrar rannsóknir í gangi sem snúa að dreifðum byggðum. Rannsóknirnar miða að því hvernig við styrkjum landsbyggðina og dreifðar byggðir en niðurstöðurnar koma m.a. til með að nýtast sveitarfélögum á Íslandi.

Ég er svo líka að fara af stað með kúrs í stjórnmálasálfræði við háskólann sem ég held að verði mjög skemmtilegt. Mér er einnig kippt inn í minni verkefni eins og að prófdæma. Ég á svo sjálfur eftir að birta nokkrar rannsóknir úr doktorsnáminu en það tekur allt langan tíma í háskóla,“ segir Bjarki og bætir við að langlundargeð og dass af nördisma sé það sem þarf til að starfa við Háskóla.

Hægt er að hlusta á þáttinn í heild sinni á soundcloud.com/skessuhorn, skinkuhorn.is, á Spotify eða í spilaranum hér fyrir neðan.

Skinkuhorn – Bjarki Þór Grönfeldt Gunnarsson