Langaði að hágrenja þegar ég kom í mark

Skagamaðurinn Almar Viðarsson er gestur Skinkuhornsins þessa vikuna. Almar tók nýlega þátt í Ironman þríþrautarkeppni í Hamborg í Þýskalandi og var þetta í þriðja sinn sem hann tekur þátt í keppninni. Í Ironman eru fyrst syntir 3,8 kílómetrar, svo eru hjólaðir 180 km og endað á að hlaupa maraþon sem er 42,2 km. Alls hafa þrír Skagamenn náð að ljúka við Ironman en það eru auk Almars þeir Eiríkur Jóhannesson og Rúnar Þór Óskarsson. Eftir knattspyrnuferilinn sem lauk árið 2017 fékk Almar áhuga á hlaupum og tók fljótlega þátt í hálfmaraþoni og maraþoni. Árið 2017 plataði frændi Almars, Hafþór Rafn Benediktsson, hann með því að selja honum svaka gott hjól ef hann tæki þátt í Ironman með honum. „Ég sló bara til, ég vissi ekki einu sinni hvað Ironman var á þeim tíma. Kunni ekki að synda eða neitt þannig að þetta var svolítið vesen í byrjun.“

Fyrsta mótið gekk mjög vel

Árið 2018 tók Almar þátt í sínum fyrsta Ironman rétt fyrir utan Barcelona á Spáni og tók undirbúningurinn um níu mánuði. Fyrsta mótið gekk mjög vel hjá Almari og vonum framar. „Það gekk alveg dúndurvel og ég var með þeim fremstu af Íslendingunum sem tóku þátt sem var mjög gott. Ég var búinn að stefna á það að vera undir tólf klukkutímum og var rétt undir ellefu. Þetta er allt svo spennandi í byrjun og maður fattar ekki hvað það þetta er erfitt, hausinn platar mann þar.“ Þú hefur ekkert sprungið á miðri leið? „Nei, alls ekki. Ég held að ég sé með ágætlega sterkan haus í svona. Þetta er svo gaman og spennandi, fólk er gargandi á mann og maður gleymir sér alveg. Svo er þetta rosaleg sigurvíma þegar nafnið manns er kallað upp og sagt að maður sé Ironman.“

Árið 2021 var komið að næstu Ironman keppni hjá Almari og var hún haldin rétt fyrir utan Bologna á Ítalíu. Sú keppni gekk ekki alveg eins vel og fyrsta keppnin en gekk engu að síður ágætlega. Þar gekk mjög illa hjá Almari í sundinu og var hann með tólf mínútum verri tíma en í Barcelona. „Ég var verri í sundinu og held í öllu, þá var ég ekki nógu undirbúinn og hélt að þetta yrði auðveldara. Ég var ekki búinn að æfa nógu mikið og tíminn minn var 15 mínútum verri en síðast. Það var heimsfaraldur í gangi þarna og það var miklu minni stemning í hlaupabrautinni.“

Banaslys í Hamborg

Í byrjun júní á þessu ári var förinni heitið til Hamborgar og þar var Almar að kljást við meiðsli á öxl í undanfara keppninnar. „Ég var með klemmda taug og það sýndi sig í sundinu því þetta var lélegasta sundið mitt í Ironman til þessa. Ég kom upp úr sundinu alveg búinn á því og var alveg sjö til átta mínútur að jafna mig á skiptisvæðinu. Fyrstu kílómetrana á hjólinu var ég hálf grillaður og nokkru síðar komum við að slysi þar sem mótorhjól með myndatökumanni hafði tekið fram úr nokkrum mótorhjólum. Það lenti á hjólreiðakonu sem var að keppa. Þegar við komum að þessu þá voru sjúkrabílar, lögreglubílar og þyrla á svæðinu og reiðhjólið í tvennt. Þá erum við stoppaðir og beðnir um að reiða hjólin upp á hól, labba svo með þau einhverja þrjú hundruð metra og það var hræðilegt að horfa upp á þetta.“ Það fréttist fljótt að sá sem keyrði mótorhjólið hefði látist og Almar segir að hann hafi ekkert heyrt meira af þessu. Þrátt fyrir þetta gekk Almari mjög vel að hjóla og var á 5:18, hélt sig á púls í kringum 150 og náði sínum besta tíma á hjólinu. Síðan var komið að hlaupinu og þar var hlaupið fjóra hringi. „Það var ótrúlega gaman. Fyrsti hringurinn var mjög auðveldur, annar hringurinn aðeins erfiðari, þriðji mjög erfiður og svo heldur maður að fjórði hringurinn verði geggjað þægilegur en þá ertu orðinn agalega þreyttur. Það var svo mikil stemning og alls staðar fólk og tónlist þannig að það hjálpaði manni helling.“

Hækkaði sig upp um yfir þúsund sæti í hlaupinu

Eftir að Almar kom upp úr sundinu náði hann að hækka sig upp um 1004 sæti sem hlýtur að vera einhvers konar met. „Það er örugglega nálægt einhverju meti og alla vega Íslandsmet, ég trúi ekki öðru. Þetta var skemmtilegasta keppnin sem ég hef tekið þátt í, þetta var líka mest brútal sem maður hefur séð. Maður sá kannski keppendur liggjandi, sjúkraliða að hjálpa þeim og fólk ælandi út um allt sem var aðallega í hlaupinu.“ En hvað fær Almar út úr þessu? „Ég veit það ekki, þetta er einhver sælutilfinning og skemmtilegasta sem maður gerir. Til dæmis þegar maður kemur í mark, það er ótrúlegt. Til dæmis í Barcelona þá var ég alveg að fara að grenja sem ég vildi að enginn sæi svo ég tók á það ráð að fagna eins og brjálaður áður en ég kom í markið, annars hefði ég farið að hágrenja af gleði. Það er hellingur af fólki sem kemur grátandi í mark og maður er sjálfur mjög lítill í sér eftir þetta, maður er búinn að ná markmiðinu og það tekur oft á.“ Í heildarkeppninni í Hamborg endaði Almar í 762. sæti af rúmlega 1800 keppendum. Hann var rétt tæplega ellefu klukkustundir að ljúka keppni; synti 3,8 km á 1.33.11 klst., hjólaði því næst 180 km á 5.17.40 klst. og hlaupið fór Almar á 5:40 klst. Samtals á 10:51.26 klst. og endaði hann í 155. sæti í aldursflokknum 40-44 ára.

Hægt er að hlusta á þáttinn í heild sinni á Spotify, skinkuhorn.is og í spilaranum hér að ofan.

Skinkuhorn – Almar Viðarsson