Kosningarnar á laugardaginn, til sameinaðs sveitarfélags Borgarbyggðar og Skorradalshrepps, mörkuðu um leið endalok sérstakrar kjördeildar í Skorradal. Í hreppnum voru 59 á kjörskrá að þessu sinni. Vel fór á með þeim Ástríði Guðmundsdóttur, Gunnari Rögnvaldssyni og Davíð Péturssyni þegar blaðamaður Skessuhorn leit þar við um nónbil. Kjörsókn í hinu sameinuðu sveitarfélagi var þá komin í 29%. Kjördeildinni í Hreppslaug var lokað klukkan 18.

Davíð Pétursson bóndi á Grund hefur setið manna lengst í kjörstjórn í hreppnum, eða í hvorki meira né minna en 65 ár. Hann segist fyrst hafa tekið sæti í kjörstjórn haustið 1961 þegar Höskuldur Eyjólfsson á Vatnshorni hætti búskap og flutti úr hreppnum. Þá voru 66 á kjörskrá í hreppnum, sjö fleiri en 2026. „Það þurfti sérstaka kosningu til að kjósa einn mann í hreppsnefnd í staðinn fyrir Höskuld. Ég var jafnframt settur hreppsstjóri þegar hann fór og skipaður hreppsstjóri vorið eftir.“ Davíð var því ungur að árum þegar hann hóf þátttöku í sveitarstjórnarmálum og í kjörstjórn, en hann er fæddur 2. apríl 1939 og var því 22 ára þegar hann fyrst tók sæti í kjörstjórninni.

Samhliða því að kjördeildin verður nú lögð af í Skorradalshreppi hættir að verða not fyrir fundargerðarbókina sem fylgt hefur starfi nefndarinnar óslitið frá árinu 1938. Það var faðir Davíðs; Pétur Bjarnason á Grund, sem ritar fremst í nýja gjörðarbók 26. júní 1938: „Bók þessi, sem er 106 blaðsíður að stærð er gjörðarbók kjörstjórnar Skorradalshrepps við kosningar innan hreppsins.“ Það stendur á endum að nú 88 árum síðar er bókin fullskrifuð. Verður henni komið fyrir með öðrum gögnum hreppsins og til varðveislu á Skjalasafninu í Borgarnesi. Í fundargerðarbókina eru skráðir alls 48 fundir kjörstjórnar, en nefndin hefur komið saman við sameiningarkosningar, hreppsnefndarkosningar, alþingiskosningar og forsetakosningar. Allflesta fundi frá árinu 1961 á Davíð Pétursson sæti í kjörstjórn. Undanskildar eru kosningar til Alþingis þegar hann var sjálfur í framboði til Alþingis á lista Sjálfstæðisflokksins. Í þau skipti tók Jóhanna Guðjónsdóttir eiginkona hans sæti í nefndinni í hans stað.

„Ég komst einu sinni á Alþingi, sat þar í tvær vikur árið 1987. Sturla Böðvarsson var þá varamaður fyrir Friðjón Þórðarson. Friðjón þurfti að sitja fund Norðurlandaráðs og Sturla átti ekki heiman gengt. Þá sat ég á Alþingi í hálfan mánuð. Minnisstæðast frá þeim dögum var umræða um að breyta bílnúmerakerfinu, sem mér var meinilla við að gera og við Skúli heitinn Alexandersson börðust hatrammlega á móti þessari breytingu. Það var reyndar fellt í það skiptið, en samþykkt þegar málið var aftur tekið upp síðar.“ Davíð hefur alla tíð safnað samstæðu númerum. Einkabíllinn hans er einmitt með sérnúmerið M-111. „Skemmtilegt að segja frá því að það er nákvæmlega sami árafjöldi og hreppsstjóri sat á Grund,“ segir Davíð Pétursson sem á laugardaginn sat sinn síðasta fund í kjörstjórn Skorradalshrepps.

**Fundargerðabók kjörstjórnar sem notuð hefur verið óslitið í 88 ár**

Síðasti kjörfundurinn í Skorradalshreppi