„Ég var að pakka saman dótinu mínu og er á leið út að spila undir í danstíma. Sólin er hátt á lofti og hitinn er nálægt 20 gráðum, þetta er svona stuttermabolaveður,“ segir Reynir Hauksson gítarleikari í samtali við Skessuhorn, því hann veit að heima á Íslandi eru landar hans ætíð jafn áhugasamir um veðrið. Reynir býr í Granada á Spáni, þar sem hann nemur flamengógítarleik. Hann er væntanlegur til landsins í lok mars og ætlar að leggja upp í tónleikaferðalag fyrstu daga aprílmánaðar. Auk þess mun hann heimsækja tónlistarskóla og grunnskóla í landshlutanum og kynna fyrir krökkunum töfra flamengótónlistar, en verkefnið nýtur styrks úr Uppbyggingarsjóði Vesturlands. „Ég kem til landsins á morgun, 28. mars og þetta verkefni hefst 1. apríl. Þá heimsæki ég fyrsta skólann. Ég fer í Tónlistarskólann á Akranesi, Tónlistarskóla Borgarfjarðar, Tónlistarskóla Stykkishólms auk þess sem ég heimsæki Grunnskóla Borgarfjarðar bæði á Hvanneyri og Kleppjárnsreykjum. Þar ætla ég að undirbúa komandi kynslóðir, reyna að sá fræjum flamengósins í huga barnanna á þessum mikla mótunaraldri í þeirra lífi, svo þetta verði nú allt saman sjálfbært hjá okkur,“ segir Reynir léttur í bragði. „Ég gef mér svona tíu ár í þetta. Að þeim tíma loknum getum við kannski hætt að flytja inn fólk til að spila flamengótónlist og sjáum bara um þetta sjálf, hver veit,“ bætir hann við.

Að baki skólaheimsóknunum liggja bernskuminningar hans sjálfs og ástríðan fyrir flamengótónlist. Hann sá fram á að hafa góðan tíma til að gera þetta á meðan Íslandsdvölinni stendur og ákvað að láta verða af þessu. „Með þessu nýti ég ferðina betur. Ég er að koma hvort eð er og spila á tónleikum á kvöldin. Þá er dagurinn laus. Ég man þegar ég var krakki þá komu reglulega tónlistarmenn í heimsókn í skólann, sögðu frá hinu og þessu og mér fannst það alltaf skemmtilegt. Sérstaklega er mér minnisstætt þegar ég var svona níu eða tíu ára, þá kom Kristján Eldjárn gítarleikari í heimsókn í Andakílsskóla. Það fannst mér alveg stórmerkilegt, hann sjálfur áhugaverður músíkant og alveg rosalega góður gítarleikari. Hann dó síðan örfáum árum síðar, langt fyrir aldur fram blessaður.“

Aukinn áhugi á flamengótónlist

Tónleikaröð Reynis hefst á Vesturlandi með tónleikum í heimaþorpinu. „Ég byrja ferðalagið á tónleikum á Hvanneyri Pub 2. apríl. Það er afmælisdagurinn minn og ég vil hvergi annars staðar vera þennan dag en á Hvanneyri,“ segir Reynir. Daginn eftir kemur hann fram í Vinaminni á Akranesi og 4. apríl verður hann í Vatnasafninu í Stykkishólmi. Reykholtskirkja verður fjórði viðkomustaður Reynis á Vesturlandi mánudaginn 8. apríl, en aðra daga kemur hann einnig fram í Reykjavík, á Selfossi og í Grindavík. Um er að ræða einleikstónleika, þar sem Reynir kemur einn fram með gítarinn, eins og hann hefur gert á tónleikaferðalögum sínum um landið undanfarin ár. „Ég kem fram með nýtt prógramm, en að öðru leyti verða tónleikarnir með svipuðu sniði og verið hefur,“ segir hann. Tónleikar Reynis hafa mælst vel fyrir og hann finnur fyrir auknum áhuga á flamengótónlist ár frá ári. „Með hverju skiptinu koma fleiri og fleiri á tónleikana, áhuginn virðist alltaf vera að aukast. Það er líka ekki mikið um þetta heima á Íslandi, að menn séu að spila svona músík á gítarinn. Þó það sé rosalega mikil tónlist á Íslandi þá hefur þessi angi ekki náð að teygja sig til landsins enn sem komið er,“ segir Reynir. „Af því ég er búsettur hérna í Granada og að stúdera þessa músík, þá finnst mér eina vitið að koma heim og sýna hvað ég er búinn að læra hérna úti. Ég held að það sé býsna íslenskt að gera svoleiðis,“ segir Reynir. „Þrátt fyrir að samfélagið sé orðið býsna opið og ég gæti stúderað flamengó heima á Hvanneyri með því að opna YouTube, þá er alltaf mjög skýrt í huga þjóðarinnar hvar Ísland endar og útlönd byrja. Þess vegna held ég að Íslendingar sem hafa farið út, séð og upplifað eitthvað sem þeim finnst merkilegt, finni oft hjá sér ákveðna þrá til að deila þeirri reynslu með fólkinu sínu heima,“ bætir hann við.

Fjölmargir stílar flamengósins

Aðspurður segir Reynir að áhorfendur megi eiga von á flamengóeinleikstónleikum eins og þeir eru að mestu uppsettir í Andalúsíu á Spáni. „Farið verður í bæði hefbundna sálma og eins einhverjar nútímapælingar í flamengó. Ætlun mín er að reyna að gefa áhorfendum sem best þversnið af þessari tegund tónlistar. Flamengó er í raun regnhlífarhugtak yfir alla sígaunasöngva Andalúsíuhéraðs, en allt í allt eru stílar flamengó um það bil 35 talsins, þar sem hver stíll hefur sinn brag og sitt tilefni. Flamengóinn byggir í raun á smátónsmíðum. Eitt lag er kannski samansett úr tíu litlum lögum, en móðurstíllinn heldur því saman og maður er alltaf innan þess ramma,“ segir hann. „Að því sögðu hefur hver stíll líka sínar eigin reglur og þetta lærist allt smám saman. Þegar maður spilar með öðrum, til dæmis með söngvara sem mér persónulega finnst skemmtilegast, þá þurfum ég og söngvarinn báðir að vera meðvitaðir um reglurnar, þetta sameiginlega í laginu, svo samtal okkar á milli geti átt sér stað í tónlistinni. Það er meira frelsi að vera einn með gítarinn, en alltaf gildir sama grunnprinsippið; ef maður er í einum stíl þá heldur maður sig innan hans og verður umfram allt að virða taktinn. Það þarf að vita hvar hann liggur, maður þarf að vera í samhengi, vita hvar maður byrjar og hvar maður endar og halda fílinu út allan flutninginn,“ segir Reynir. „Þetta mun ég allt saman reyna að útskýra fyrir krökkunum í skólunum. Á tónleikunum mun ég líka í stuttu máli kynna lögin og stílana og reyna að útskýra í grófum dráttum hvað þetta gengur út á allt saman,“ bætir hann við.

Að lokinni tónleikaferð sinni í aprílbyrjun heldur Reynir aftur út til Spánar. Hann er síðan væntanlegur til landsins á nýjan leik seinni part maímánaðar. „Tónleikarnir og skólaheimsókirnar núna eru í raun fyrsti fasinn af þremur í þessu flamengóverkefni mínu. Vikuna 20.-25. maí kem ég aftur og þá með söngvara með mér. Við förum á flakk og munum spila og syngja flamengó víðs vegar um landið, meðal annars á Vesturlandi. Í lok þeirra viku koma síðan dansarar og fleiri hljóðfæraleikarar til liðs við okkur og við setjum upp flamengósýningu í Kópavogi laugardagin 25. maí. Þannig að þetta er þriggja fasa pakki,“ segir Reynir Hauksson að endingu.

Reynir Hauksson fer með flamengóinn um Vesturland