Mótanefnd KSÍ hefur staðfest niðurröðun leikja í Lengjubikarnum árið 2022. Lengjubikarinn hefur síðustu ár fest sig í sessi sem helsta undirbúningsmót liða fyrir Íslandsmótið í knattspyrnu. Skessuhorn tekur hér saman það helsta um liðin af Vesturlandi.

Skagamenn leika í A-deild karla og eru með Breiðabliki, Fjölni, KV, Stjörnunni og Þór Akureyri í riðli 2. Fyrsti leikur Skagamanna verður gegn Þór laugardaginn 12. febrúar í Akraneshöllinni, hefst klukkan 14 og verður sýndur beint á Stöð 2 Sport. Fimmti og síðasti leikur ÍA í riðlinum verður svo mánudaginn 14. mars gegn Stjörnunni á Samsung vellinum í Garðabæ, hefst klukkan 19 og er einnig sýndur beint á Stöð 2 Sport. Laugardaginn 19. mars verða undanúrslitin spiluð þar sem efstu lið riðlanna fjögurra etja kappi og úrslitaleikurinn í A deild karla er svo áætlaður laugardaginn 2. apríl.

Víkingur Ólafsvík leikur í B deild karla og er með ÍR, Kára, KFS, KH og Víði í riðli 1. Fyrsti leikur riðilsins verður stórleikur Kára og Víkings föstudaginn 18. febrúar í Akraneshöllinni og hefst klukkan 20. Síðasti leikur Víkings í riðlinum er laugardaginn 26. mars á Ólafsvíkurvelli klukkan 14 og síðasti leikur Kára er sunnudaginn 27. mars gegn KFS á Domusnova vellinum í Breiðholti klukkan 14. Undanúrslitin í B deild karla verða laugardaginn 2. apríl og úrslitaleikurinn fimmtudaginn 28. apríl.

Reynir Hellissandi leikur í C deild karla og er með GG, Hvíta riddaranum, Ísbirninum, og Kríu í riðli 3. Fyrsti leikur Reynis í riðlinum er gegn Ísbirninum laugardaginn 5. mars í Kórnum í Kópavogi og hefst klukkan 17. Síðasti leikur Reynis er gegn Hvíta riddaranum laugardaginn 2. apríl á Ólafsvíkurvelli og hefst klukkan 14.

Skallagrímur leikur einnig í C deild karla og er með Hamri, KÁ, KFB og Stokkseyri í riðli 5. Fyrsti leikur Skallagríms er gegn Hamri sunnudaginn 6. mars í Akraneshöllinni og hefst klukkan 16. Síðasti leikur Skallagríms er gegn KÁ laugardaginn 26. mars á Ásvöllum í Hafnarfirði og hefst klukkan 21.

Umspil í C deild hefjast laugardaginn 16. apríl, undanúrslitin sunnudaginn 1. maí og úrslitaleikurinn laugardaginn 7. maí.

ÍA leikur í C deild kvenna og er með Einherja, Fram, Hamri, KH og Völsungi í riðli 2. Fyrsti leikur ÍA kvenna er gegn Hamri föstudaginn 4. mars í Akraneshöllinni og hefst klukkan 20. Síðasti leikur ÍA í riðlinum er gegn Einherja laugardaginn 9. apríl í Boganum á Akureyri og hefst klukkan 15. Undanúrslitin hefjast mánudaginn 18. apríl og úrslitaleikurinn fer fram föstudaginn 22. apríl.

Niðurröðun í Lengjubikarnum 2022 staðfest