Það viðraði vel fyrir bændur og búsmala þegar Síðufjallið var smalað á laugardaginn og fé rekið til réttar á Nesmel í Hvítársíðu. Þægileg gola og sextán stiga hiti gerði daginn fallegan í alla staði. Síðufjallið er einkum smalað til að létta á þeim fjárfjölda sem annars væri rekinn til Þverárréttar um næstu helgi. Féð í réttinni var að stærstum hluta frá þremur bæjum; Sámsstöðum og Bjarnastöðum í Hvítársíðu og Ásbjarnarstöðum í Stafholtstungum. Réttarhaldið tók ekki langan tíma.

Hér er vaskt fólk litast um eftir sínum rollum.

: Árni B Bragason á Þorgautsstöðum II leitar fjár.

: Móra dregin í Sámsstaðadilkinn þar sem Þuríður bóndi var hliðvörður.

: Systurnar Guðrún og Agnes Guðmundsdætur á Síðumúlaveggjum.

: Guðmundur á Sámsstöðum og Kjartan á Síðumúlaveggjum með afkæmin sín.

: Sigvaldi í Hægindi og Jón á Kópareykjum skoða hér ofan í feldinn á svörtu hrútlambi frá Hofsstöðum sem er undan sæðingarstöðvar hrúti sem notaður er til að rækta upp ullargæði.

: Guðjón á Síðumúlaveggjum búinn að handsama hrútlamb úr eigu sinni.

Nesmelsrétt í Hvítársíðu var fyrsta rétt haustsins – myndband og myndir