Leiðbeiningar um hvernig megi forðast smit
Landspítalinn og Alþjóðaheilbrigðismálastofnunin (WHO) hafa sett fram leiðbeiningar fyrir almenning til að forðast smit í þeim tilgangi að draga úr líkum á alvarlegum veikindum. Þar segir að Kórónaveiran hagi sér svipað og inflúensa og að einkennin séu svipuð og smitleiðirnar sömuleiðis. Því er fólk hvatt til að gæta vel að handþvotti og hreinlæti í kringum augu, nef og munn auk þess að huga að meðhöndlun matar. Í frétt á vef Landpítalans eru eftirfarandi leiðbeiningar sem unnar voru í samvinnu við WHO:
- Hreinsið hendur oft og reglulega; notið heitt vatn og sápu – einnig handspritt ef kostur er.
- Hóstið og hnerrið í krepptan olnboga eða í pappír (eldhúss- eða klósettpappír) og hendið pappírnum strax að notkun lokinni.
- Gætið hreinlætis kringum augu og öndunarveg; munn og nef.
- Forðist náið samneyti við fólk sem er með hita eða hósta eða augljós flensueinkenni.
- Reynið sjálf að komast hjá ferðalögum ef veikindi af þessu tagi eru til staðar.
- Ef þið eruð með háan hita eða þungan hósta eða finnið fyrir öndunarerfiðleikum leitið þá til læknis þegar í stað og greinið frá nýlegum ferðalögum, hafi einhver verið.
- Munið að hringja á viðkomandi heilbrigðisstofnun eða í símanúmerið 1700 (Ísland) áður en farið er þangað svo hægt sé að gera ráðstafanir þar til að forðast smit.
- Forðist alla óvarða snertingu við villt dýr og húsdýr á landsvæðum þar sem kórónaveiran Novel hefur greinst.
- Á ferðalögum um þekkt smitsvæði kórónaveiru ætti fólk að forðast hráar eða lítið eldaðar dýraafurðir. Það á einkum við um hrátt kjöt, mjólk og innyfli dýra.
- Mikilvægt er að gæta ítrustu varúðar við eldamennsku á smitsvæðum þar sem kórónaveira hefur greinst.
Nánari upplýsingar er að finna á vef Landspítalans.
