Nafn: Hafsteinn Kjartansson

Fjölskylduhagir/búseta: Giftur Þuríði S. Baldursdóttur. Afrakstur okkar eftir 30 ára samband er þrjú börn sem eru nú farin að gefa okkur barnabörn. Búseta síðustu þrjú ár er í Grundarhverfinu á Kjalarnesi.

Starfsheiti/fyrirtæki: Kjötiðnaðarmaður í Verslun Einars Ólafssonar eða Einarsbúð eins og hún er kölluð í daglegu tali á Akranesi. Hún verður 90 ára gömul á næsta ári og er í eigu sömu fjölskyldu. Geri aðrir betur.

Áhugamál: Það má segja að áhugmálin séu laxveiði, hjólreiðar, gönguferðir, ferðalög innan lands og það að sinna ýmsum verkefnum í sumarbúðunum Ölveri.

Dagurinn: Miðvikudagurinn 29. nóvember 2023.

Klukkan hvað vaknaðirðu og hvað var það fyrsta sem þú gerðir? Að venju lét síminn mig vita að klukkan væri fjórar mínútur yfir sex og tími til að velta sér úr rúminu og staulast fram á salerni í hefðbundin morgunverk þar.

Hvað borðaðirðu í morgunmat? Eitt lítið glas af Ab mjólk til að skola niður hefðbundnum lyfjaskammti sem gjarnan fylgir hækkandi aldri.

Hvenær fórstu til vinnu og hvernig? Lagt af stað í vinnu klukkan 06:40 á eðalfákinum Overland. Ekki má hjóla í gegnum göngin.

Fyrstu verk í vinnunni? Kveikja á kjötborðinu.

Hvað varstu að gera klukkan 10? Staðið upp frá borðum eftir gott kaffispjall við vinnufélagana. Þá er hinn eiginlegi morgunmatur étinn.

Hvað gerðirðu í hádeginu? Fótadekur hjá hinum frábæra fótaaðgerðafræðingi Láru Hlöðvers.

Hvað varstu að gera klukkan 14? Þá var hið vinsæla Einar Ól pylsupasta græjað þar sem það vill gjarnan klárast daglega. Vara sem var kynnt sem hugmynd á námskeiði hjá Kötlu fyrir um 30 árum. Gaman að geta þess að undirritaður var ásamt Gunnari Elíassyni forvera mínum við kjötborðið í Einarsbúð á þessu námskeiði. Ég í versluninni Brekkuval í Kópavogi.

Hvenær hætt og það síðasta sem þú gerðir í vinnunni? Klukkan fjögur var kippt úr frosti fyrir næsta dag og litið yfir vinnsluna til að athuga hvort þrif væru í lagi.

Hvað gerðirðu eftir vinnu? Eins og svo oft áður var keyrt upp í sumarbúðirnar Ölver til vinnu í því frábæra umhverfi sem þar er.

Hvað var í kvöldmat og hver eldaði? Þar sem verkefni var í gangi þá kippti ég með mér 1944 rétti og fyrir valinu voru soðnar kjötbollur og sá örbylgjuofninn alfarið um eldamennskuna.

Hvernig var kvöldið? Kvöldinu var eytt við örlitla málningarvinnu og bið eftir að Orkuveitan kláraði tengivinnu á Deildartungulögninni svo hægt væri að setja dælur í gang svo hiti kæmist í lag í sumarbúðunum og þeim sumarbústöðum sem njóta hitaveitunnar. Upp úr tíu um kvöldið hitti ég orkuveitumenn í dæluhúsinu sem Ölver á og setti dæluna í gang. Við tók bið eftir að allt myndi virka. Allt tókst vel og hiti komst á sumarhúsahverfið.

Hvenær fórstu að sofa? Klukkan var langt gengin í eitt eftir miðnætti þegar heim var komið og var þá kærkomið að leggjast í bólið.

Hvað var það síðasta sem þú gerðir áður en þú fórst að hátta? Athugaði hvort að útihurð væri örugglega læst.

Hvað stendur upp úr eftir daginn? Ánægja með gott dagsverk þar sem allt gekk upp.

Eitthvað að lokum? Það er mjög mikilvægt að versla í heimabyggð og íslenskar landbúnaðarvörur ættu að vera reglulega á borðum landsmanna. Takk fyrir mig!

Kjötiðnaðarmanns á Akranesi