Í þessum lið leggjum við fyrir tíu spurningar til íþróttamanna úr alls konar íþróttum á öllum aldri á Vesturlandi. Íþróttamaður vikunnar að þessu sinni er Arnar Geir sem stundar skotfimi með Skotfélagi Snæfellsness.

Nafn: Arnar Geir Diego Ævarsson

Fjölskylduhagir? Ég er giftur henni Guðrúnu Svönu Pétursdóttur og eigum við saman þrjú börn.

Hver eru þín helstu áhugamál? Skotfimi, Skotfélag Snæfellsness og allt sem því tengist, skotveiðar, PRS Iceland samfélagið eins og það leggur sig og jú að sjálfsögðu fjölskyldan og vinirnir.

Hvernig er venjulegur dagur hjá þér um þessar mundir? Dagarnir hjá mér um þessar mundir einkennast af vinnu og undirbúningi fyrir næsta mót, en þess má geta að ég er að fara á heimsmeistaramótið í PRS skotfimi sem keppandi núna 11.-15. september sem haldið verður í Grand Junction í Colorado í Bandaríkjunum og verð ég þar í hópi með allra færustu íþróttaskotmönnum heims.

Hverjir eru þínir helstu kostir og gallar? Minn helsti kostur er sennilega sá að það þarf ansi mikið til þess að ég verði eitthvað stressaður og ég reyni alltaf að gera allt vel sem ég geri. Minn helsti galli er sennilega sá að ef ég fæ áhuga á einhverju að þá fæ ég svo rosalegan áhuga að ég fer alltaf alla leið inn og allt annað gleymist.

Hversu oft æfir þú í viku? Ég reyni að fara út á skotsvæði allavega tvisvar í viku en svo er líka fullt af klukkutímum sem fara í endurhleðslu og annan undirbúning.

Hver er þín fyrirmynd í íþróttum? Í minni íþrótt að þá eru nokkrir sem ég lít mikið upp til og þeir sem ég lít hvað mest upp til þessa dagana eru Rúnar Jónsson sem býr í Noregi og er meðal fremstu skytta í heiminum í dag og svo félagarnir Stefán Eggert Jónsson og Einar Pétursson sem hafa hjálpað okkur hinum svo mikið með að læra og skilja leikinn.

Af hverju valdir þú skotfimi? Ég hef alltaf haft áhuga á skotveiðum og byssum svo þegar að ég kynntist þessari tegund af skotfimi að þá var bara ekki aftur snúið.

Hver er fyndnust/fyndnastur af þeim sem þú þekkir? Steinar Smári Guðbergsson (Meindýraeyðir Íslands) er sennilega sá sem ég hlæ oftast að og með, þvílíkt gull af manni.

Hvað er skemmtilegast og leiðinlegast við þína íþrótt? Skemmtilegast er félagsskapurinn, tækifærin, endalausra pælingar, alltaf eitthvað nýtt dót fyrir okkur dellukallana. Leiðinlegast er sennilega bara veturinn þegar maður kemst ekki út á skotsvæði og engin mót eru í gangi.

Íþróttamaður vikunnar þarf ansi mikið til þess að verða stressaður