Í þessum lið leggjum við fyrir tíu spurningar til íþróttamanna úr alls konar íþróttum á öllum aldri á Vesturlandi. Íþróttamaður vikunnar að þessu sinni er Sigursteinn Ásgeirsson kúluvarpari. Sigursteinn er í háskólanámi í Bandaríkjunum en hann stundar nám og æfingar í University of Mount Olive sem er í Norður-Karólínuríki. Sigursteinn varð Íslandsmeistari í kúluvarpi í sumar og framundan er bikarmót FRÍ 17. ágúst.

Nafn: Sigursteinn Ásgeirsson

Fjölskylduhagir? Er frá Þorgautsstöðum í Hvítársíðu sem er langbesta sveit landsins. Ég á þrjú systkini, einn eldri bróður, eina eldri systur og eina yngri systur. Ég bý á Þorgautsstöðum þegar ég er á landinu.

Hver eru þín helstu áhugamál? Ræktin, golf, hafa gaman með vinum mínum, horfa á íþróttir, þætti og bíómyndir.

Hvernig er venjulegur dagur hjá þér um þessar mundir? Á venjulegum degi þá vakna ég klukkan 7:05 því ég mæti í vinnu klukkan 8 í garðyrkjustöðina Laugaland þar sem ég hjálpa til við að rækta gúrkur. Ég er þar til kl. 16 og eftir það þá er æfing. Fer eftir degi hvort það sé kúluvarpsæfing eða lyftingaæfing, ef það er kúlan þá fer ég í bæinn að hitta þjálfarann minn og kasta kúlu, annars lyfti ég bara í Borgarnesi. Eftir æfingar þá keyri ég heim, fæ mér kvöldmat og svo á eftir því þá fer ég í háttinn og geri mig tilbúinn fyrir alveg eins næsta dag. Vinna, æfa og sofa í stuttu máli, getur verið helvítis álag.

Hverjir eru þínir helstu kostir og gallar? Kostir: Góðhjartaður, metnaðarfullur og mjög góður vinur vina minna. Gallar: Feiminn, en samt búið að lagast með árunum. Get farið að ofhugsa hluti líka.

Hversu oft æfir þú í viku? Ég æfi 6-7 sinnum í viku, hvíld á sunnudögum.

Hver er þín fyrirmynd í íþróttum? Uppáhalds íþróttamaðurinn minn er körfuboltamaður og það er Dwyane Wade sem er hættur í dag en ég elskaði hann og hans sögu hjá Miami Heat. Ég vil meina að hann hafi haldið uppi Lebron James þegar þeir voru saman hjá Heat þó aðrir segi annað. Í kúluvarpinu þá verð ég að segja Joe Kovacs sem er einn hrikalegasti maður sem ég hef séð, hann er einn sterkasti maður í heimi held ég og kúluvarpstæknin hans er eitthvað sem ég hef oft notað til að hjálpa minni eigin tækni.

Af hverju valdir þú kúluvarp? Ég er búinn að vera í frjálsum íþróttum síðan ég var lítill krakki og ég var alltaf bestur í öllum kastgreinunum frekar en hlaupum og hoppum þannig að þegar ég varð unglingur þá fór ég bara að keppa í kastgreinum. Ég var bestur í spjóti og kúlu en ég hafði meiri áhuga á kúlu þannig ég fór að einblína á hana á menntaskólaaldri. Og ég valdi kúlu fram yfir körfubolta líka því ég var á fullu í körfu líka og ætlaði alltaf að vera körfuboltamaður en ég var bara betri í kúlunni og það er líka gaman að vera sterkari en flestir.

Hver er fyndnust/fyndnastur af þeim sem þú þekkir? Gríðarlega erfitt að velja, ég á marga vini sem eru lúmskir eða lúmsk í gríninu, en um þessar mundir þá verð ég að velja Jón Steinar en alltaf þegar ég er með vinahópnum mínum og hann er þar þá er hann oft fastur í góðu grínefni og er að búa til mjög fyndið efni fyrir nánu vini sína.

Hvað er skemmtilegast og leiðinlegast við þína íþrótt? Leiðinlegasta við íþróttina mína er líklega að hita upp, það tekur alltaf smá tíma og er því miður ekki nógu skemmtilegt. Það skemmtilegasta er í lyftingum að lyfta miklum þyngdum hratt og létt og í kúlunni þá er það að finna að kastið mitt er gott um leið og ég sleppi kúlunni því þá veit ég að það verður langt áður en kúlan lendir.

Íþróttamaður vikunnar – Sem krakki var ég alltaf bestur í kastgreinunum