Í þessum lið leggjum við fyrir tíu spurningar til íþróttamanna úr alls konar íþróttum á öllum aldri á Vesturlandi. Íþróttamaður vikunnar að þessu sinni er Rósa sem spilar blak í 1. deild kvenna með UMFG í Grundarfirði.

Nafn: Rósa Guðmundsdóttir

Fjölskylduhagir? Í sambúð með Valdimar Ásgeirssyni og hundinum Tuma.

Hver eru þín helstu áhugamál? Blak, húsabyggingar og góðar stundir með fólkinu mínu.

Hvernig er venjulegur dagur hjá þér um þessar mundir? Vakna til að mæta í vinnu og er mætt í vinnu um klukkan 07:50. Þá þarf að fá sér kaffibolla! Eftir vinnu er farið að fylgjast með framkvæmdum við húsið (erum að byggja okkur lítið hús í Grundarfirði) og svo er auðvitað farið á blakæfingu.

Hverjir eru þínir helstu kostir og gallar? Minn helsti kostur í blakinu er hæðin enda er maður um 186 cm, það hjálpar mikið til í blakinu! Stór kostur hjá mér er að ég sé oft gleðina í lífinu og leiknum. Helsti gallinn er að maður er „dottin“ af léttasta skeiðinu og mætti vera meira „quick.“ En þá er bara að vera á tánum og gera sitt besta! Dagsformið getur verið misjafnt.

Hversu oft æfir þú í viku? Það eru blakæfingar tvisvar í viku og svo fer ég 2-3 sinnum í viku í OnPoint þjálfun hjá Gestheiði Sveinsdóttur í BOX7 Grundarfirði, mæli sérstaklega með því!

Hver er þín fyrirmynd í íþróttum? Anna María Reynisdóttir! Frábær íþróttamaður og fyrirmynd!

Af hverju valdir þú blak? Það hefur alltaf verið blakmenning í Grundarfirði, ég æfði og spilaði blak sem unglingur. Svo fór maður í höfuðborgina í skóla og hætti, sá reyndar alltaf eftir því. Svo þegar ég flutti aftur heim (tók reyndar aðeins of langan tíma í það) þá fór ég að byrja aftur að æfa. En ég náði að byrja aftur um 30 ára og komst þá auðvitað á hinu landsfrægu Öldungamót í blaki! Svo er bara svo gaman að spila blak, maður lærir að treysta vel á liðsfélagann því ekki er hægt spila blak einn.

Hver er fyndnust í liðinu? Við erum svo margara skemmtilegar! Mikill húmor og læti í okkur, mér dettur Rúna og Silja í hug! Þær eru alltaf til í sprell.

Hvað er skemmtilegast og leiðinlegast við þína íþrótt? Skemmtilegasta við blakið er að maður verður að treysta næsta manni vel, vera agaður og rólegur til að ná sem besta spili! Ásamt því að liðið verður allt að spila vel til að ná sem bestu spili og árangri. Mér dettur ekkert leiðinlegt í hug nema kannski þegar maður vinnur ekki! Áfram UMFG!

Íþróttamaður vikunnar – Sé oft gleðina í lífinu og leiknum