Í þessum lið leggjum við fyrir tíu spurningar til íþróttamanna úr alls konar íþróttum á öllum aldri á Vesturlandi. Íþróttamaður vikunnar að þessu sinni er glímukappinn Þórarinn Páll úr Dölum.

Nafn: Þórarinn Páll Þórarinsson heiti ég.

Fjölskylduhagir? Í minni fjölskyldu erum við alls ellefu. Við erum þrír bræður og svo eru systur mínar sex talsins. Svo eru auðvitað foreldrar mínir, Ragnheiður Pálsdóttir og Þórarinn B. Þórarinsson.

Hver eru þín helstu áhugamál? Mín helstu áhugamál eru glíma, búskapur og að spila aðeins á gítarinn.

Hvernig er venjulegur dagur hjá þér um þessar mundir? Ég er nú í skóla eins og flestir unglingar og ferðalagið í skólann tekur um klukkutíma. Ég æfi glímu, fer á böll, er í björgunarsveit og hjálpa til á búinu.

Hverjir eru þínir helstu kostir og gallar? Kostirnir eru að ég er sterkur, viðkunnanlegur, á auðvelt með finna út úr hlutunum og er fljótur að eignast vini. Mínir gallar eru að ég er þrjóskur og tala aðeins of mikið.

Hversu oft æfir þú í viku? Oftast nær einu sinni í viku en núna þegar keppnistímabil er búið eru engar æfingar í bili.

Hver er þín fyrirmynd í íþróttum? Ég hef ekki enn þá fundið mína fyrirmynd í íþróttum svo ég geri bara mitt besta og reyni að standa mig með prýði.

Af hverju valdir þú glímu? Félagar mínir sögðu mér að ég yrði að prófa glímu svo ég lét verða af því og endaði með því að finna mig í glímunni.

Hver er fyndnastur af þeim sem þú þekkir? Ég tel nú bara að ég sé fyndnastur.

Hvað er skemmtilegast og leiðinlegast við þína íþrótt? Mér finnst best hvað allir eru nánir í glímunni og hvað keppnisandinn er góður. Ég held nú að það eina sem mér finnst leiðinlegt við glímuna er að horfa upp á meiðsli og bíða eftir að fá að keppa.

Íþróttamaður vikunnar – Reyni að standa mig með prýði