Í þessum lið leggjum við fyrir tíu spurningar til íþróttamanna úr alls konar íþróttum á öllum aldri á Vesturlandi. Íþróttamaður vikunnar að þessu sinni er Sól sem stundar hestamennsku.

Nafn: Sól Jónsdóttir

Fjölskylduhagir? Ég er 16 ára gömul og er yngst af fjórum systkinum. Ég bý á Bergi, sveitabæ fyrir utan Grundarfjörð með foreldrum mínum.

Hver eru þín helstu áhugamál? Það eru auðvitað hestar en er líka með mikinn áhuga á kindum og fleiru en þessi eru mín helstu.

Hvernig er venjulegur dagur hjá þér um þessar mundir? Venjulegur dagur hjá mér fer eftir því hvort ég sé að fara í skólann eða í fríi. En ég fer í skólann klukkan átta og stunda þar námið, svo er ég yfirleitt komin heim klukkan 12:15 en það fer eftir deginum samt. Ég fæ mér að borða og svo fer ég út í hesthús, fer á eins marga hesta og ég get sem eru sirka fjórir til fimm. Gef þeim og er komin inn um sjö, fæ mér kvöldmat og læri og svo fer ég að sofa.

Hverjir eru þínir helstu kostir og gallar? Ég held að mínir helstu kostir séu að ég er sanngjörn og ófeimin en helsti gallinn er að ég get stundum verið pirruð.

Hversu oft æfir þú í viku? Ég reyni að æfa á hverjum degi en alla vega fimm sinnum í viku.

Hverjar er fyrirmyndir þínar í þessari íþrótt? Það eru mamma mín og pabbi því ég sé þau rækta, temja og keppa eins og ég vil gera í framtíðinni.

Af hverju stundar þú hestamennsku? Ég hef stundað hestamennsku síðan ég man eftir mér því ég var alin upp í þessari íþrótt en ég stunda hana út af því að ég gæti ekki ímyndað mér að gera eitthvað annað.

Hver er fyndnust af vinkonunum? Ég verð að segja Anna því hún segir bara sannleikann og er sama um hvað aðrir hugsa en Aþena og Fanney eru líka mjög fyndnar.

Hvað er skemmtilegasta og leiðinlegasta við íþróttina? Það skemmtilegasta er hvað maður kynnist hestunum og fólkinu en leiðinlegasta er þegar maður þarf að selja hestana eða þegar þeir verða of gamlir.

Íþróttamaður vikunnar – Leiðinlegast þegar maður þarf að selja hestana