Í þessum lið leggjum við fyrir tíu spurningar til íþróttamanna úr alls konar íþróttum á öllum aldri á Vesturlandi. Íþróttamaður vikunnar að þessu sinni er Sigrún Erla sem æfir blak í Ólafsvík.

Nafn: Sigrún Erla Sveinsdóttir

Fjölskylduhagir? Gift Daða Hjálmarssyni og eigum við saman þrjú börn; Hjálmar Þór, Kristin Frey og Ragnheiði Erlu. Svo má ekki gleyma hundinum, honum Kol.

Hver eru þín helstu áhugamál? Mér finnst alltaf gaman að ferðast og skoða nýja staði, bæði innan- og utanlands. Það jafnast fátt við útilegur á sumrin. Svo finnst mér æðislegt að vera úti í náttúrunni, hvort sem það eru göngutúrar með hundinn eða fjallgöngur en ég hef ekki gefið mér mikinn tíma í það undanfarið. Svo hefur blakið komið sterkt inn sem áhugamál.

Hvernig er venjulegur dagur hjá þér um þessar mundir? Vakna rúmlega sjö. Við Daði græjum krakkana í skóla. Svo mæti ég í vinnu klukkan átta en ég vinn sem forstöðumaður á Dvalar-og hjúkrunarheimilinu Jaðri í Ólafsvík. Það er alltaf jafn skrýtið hvað tíminn líður hratt, því áður en ég veit af, þarf ég að stökkva úr vinnu kl. 16 og sækja stelpuna mína á leikskólann. Þá taka þessi klassísku heimilisstörf við, þvottur og matreiðsla og aðstoð við heimanám krakkanna. Flesta virka daga er svo einhvers konar hreyfing fyrir eða eftir kvöldmat, þá ýmist blak, Barre burn eða heimaæfingar. Svo þarf auðvitað að viðra hundinn sem heimilismenn skipta á milli sín. Dagurinn endar svo með því að koma krökkunum í háttinn og klára að ganga frá eftir daginn.

Hverjir eru þínir helstu kostir og gallar? Ég er mikil B týpa. Það er ekki að vinna með mér með þrjú börn og vinnu. Ég er þessi B týpa sem dreymir um að vera A týpa! Kostirnir myndi ég segja að væru að ég tel mig vera frekar rólega (oftast) og er sveigjanleg týpa. Ég hef lært að ég græði ekkert á því að stressa mig of mikið á krefjandi verkefnum og reyni að taka þeim með jákvæðum huga. Ég vinn svolítið með það hugarfar að allir eru að reyna að gera sitt besta, þar á meðal ég og að verkefnin eru til að leysa þau.

Hversu oft æfir þú í viku? Ég þarf að hafa fjölbreytni í hreyfingu. Ég æfi blak tvisvar í viku. Ég er alveg komin með blak-bakteríuna og finnst fátt jafn skemmtilegt og blak. Ég er svo með heimaæfingar frá systur minni, henni Gestheiði Guðrúnu, sem er með On point þjálfun. Svo finnst mér Barre burn og Crossfit mjög skemmtilegt og reyni að vera dugleg að sækja þá tíma í Crossfitstöðinni.

Hver er þín fyrirmynd í íþróttum? Ég veit ekki hvort ég sé með fyrirmynd en síðustu ár hefur mér þótt mjög hvetjandi og gaman að fylgjast með Katrínu Tönju og Annie Mist í Crossfit.

Af hverju valdir þú blak? Ég var búin að vera í Pílunum, hópi kvenna úr Snæfellsbæ, í þó nokkurn tíma. Þessi hópur hittist alltaf eitt kvöld í viku til að spila alls konar íþróttir, meðal annars blak. Ég var ein af þeim sem fannst blakið svo skemmtilegt svo að síðasta haust ákvað ég að kanna áhugann í samfélaginu fyrir blakæfingum. Áhuginn var greinilega mikill og þá fór boltinn að rúlla. Við (sjálfskipaða blak-stjórnin) náðum okkur í þjálfara, Jóhann Eiríksson, skipulögðum tíma og í dag æfir hópur fólks blak tvisvar í viku.

Hver er fyndnust í liðinu? Regína Ösp, með ofur-kurteisi sína.

Hvað er skemmtilegast og leiðinlegast við þína íþrótt? Skemmtilegast er liðsheildin, að spila með öðrum og að allir vinni með sína stöðu innan liðsins. Það er svo gaman að bæta sig.

Leiðinlegast eru klárlega marblettirnir á framhandleggjunum en þeim fer fækkandi með hverri æfingu. Annars finnst mér ekkert leiðinlegt við þessa íþrótt. Ég hvet alla til að prófa blak! Ég fer alla vega alltaf brosandi af æfingu!

Íþróttamaður vikunnar – Fátt jafn skemmtilegt og blak