Nafn? Jóhann Þór Sigurðsson

Starf og menntun? Starfa sem rafvirki hjá Rafstöðinni á Akranesi, er menntaður rafvirki og er einnig langt kominn með rafiðnfræðinginn.

Hvernig myndir þú lýsa venjulegum vinnudegi? Maður byrjar að mæta á verkstæðið og þar er spjallað um daginn og veginn. Svo fljótlega upp úr klukkan 8 fara allir á sína vinnustaði. Minn vinnustaður þessa dagana eða næstu vikurnar er Akraborg.

Hvað hlustar þú á í vinnunni? Þegar ég hlusta á í vinnunni þá er það aðallega FM 957 eða Spotify.

Hvaða drykk færðu þér á morgnana til að koma þér í gírinn? Hvern einasta dag fæ ég mér Leanbody drykk, svo einstaka sinnum fæ ég mér Nocco eða Red Bull.

Hver er uppáhalds iðnaðarmaðurinn þinn utan þíns fyrirtækis? Þeir eru nú ansi margir í uppáhaldi hjá mér en þeir Sigmundur Ingvar Svansson og Guðmundur Þór Guðmundsson eru uppáhalds iðnaðarmennirnir mínir.

Ef þú mættir velja aðra iðn til að starfa við, hvaða iðn væri það og hvaða iðn alls ekki? Vélvirkinn eða smiður kæmi til greina en myndi nú alveg sleppa píparanum.

Hvað myndi sjónvarpsþáttur um þig heita? Rafvirkinn í blíðu og stríðu.

Getur þú nefnt skemmtilegt atvik og líka neyðarlegt sem hefur komið fyrir þig í vinnunni? Þau eru örugglega nokkur skemmtileg og neyðarleg atvikin sem hafa komið fyrir í vinnunni en það skemmtilegasta er örugglega þegar ég var í vinnuferð í Chile í uppsetningu á IQF frysti fyrir Skagann 3X. Sat ég þar fund þar sem allir töluðu spænsku en við hliðina á mér sat túlkur sem þýddi allt yfir á ensku og hvíslaði því í eyrað á mér. Svo þegar það kom að mér að tala þá þögðu allir meðan ég talaði og túlkurinn þýddi það allt yfir á spænsku. Það neyðarlegasta er örugglega fyrir sirka 20 árum síðan. Þá voru smiðir nýbúnir að klæða loft í búningsklefa í Skaganum og ég þurfti að fara upp á loftið til að tengja lýsinguna fyrir búningsklefann. Ég sat á bita uppi á loftinu en tyllti öðrum fætinum á loftklæðninguna með þeim afleiðingum að allt loftið, sirka 30 fermetrar, hrundi niður og ég með!

Finnst þér gaman í vinnunni og af hverju? Já, mér finnst mjög gaman í vinnunni, vinnuandinn og vinnufélagarnir eru einstakir og gera hvern dag betri.

Iðnaðarmaður vikunnar – Vinnufélagarnir gera hvern dag betri