Nafn? Pálmi Ólafsson.

Starf og menntun? Húsasmíðameistari og starfa sem smiður og byggingastjóri í Búðardal.

Hvað er uppáhalds verkfæramerkið þitt? Dewalt og helst ekkert annað en kannski smá Milwaukee til að róa strákana í kring um mig.

Hvað hlustar þú á í vinnunni? Hlusta yfirleitt ekki á neitt sérstakt en ef ég hlusta á eitthvað þá er það helst Rás 2.

Hvaða drykk færðu þér á morgnana til að koma þér í gírinn? Kaffi og lýsi.

Hver er uppáhalds iðnaðarmaðurinn þinn utan þíns fyrirtækis? Baldur Þorleifsson í Stykkishólmi. Duglegur og kraftmikill smiður sem gaman er að vinna með.

Ef þú mætir velja aðra iðn til að starfa við, hvaða iðn væri það og hvaða iðn alls ekki? Gæti hugsað mér að vera húsgagnasmiður en sé mig síst fyrir mér sem járnsmið.

Hvað myndi sjónvarpsþáttur um þig heita? Hvar er smiðurinn?

Getur þú nefnt skemmtilegt atvik og líka neyðarlegt atvik sem hefur komið fyrir þig í vinnunni? Var að setja upp sturtuklefa í gömlu húsi þar sem gólfið var mjög skakkt og þurfti að smíða undir klefann. Þetta gekk frekar illa enda sat frúin á bænum á kolli fyrir framan dyrnar á baðherberginu og fylgdist nákvæmlega með. Þetta var frekar óþægilegt og neyðarlegt. En skemmtilegt ævintýri var þegar við Baldur Þorleifsson fluttum gamalt hús frá Lindargötunni í Reykjavík og vestur í Stykkishólm. Þetta var hátt og breitt hús og þurfti ýmsar tilfæringar á leiðinni til að þetta tækist. Fengum BB og syni til að sjá um flutninginn á húsinu þar sem þeim liggur aldrei neitt á og eru gætnir og varkárir og auðvitað skiluðu þeir sínu verki vel. Þurftum lögreglufylgd og aðstoð starfsmanna Rarik til að lyfta rafmagnslínum sem húsið komst ekki undir. Flutningurinn varð að fara fram að næturlagi og tók fjórar nætur þó flutningstíminn væri mun lengri þar sem meðal annars varð stopp við Lyngbrekku því starfsmenn Rarik fór í starfsmannaferð til útlanda. Húsið komst þó á leiðarenda og er mikil bæjarprýði í Stykkishólmi og stendur við Þverveg 12.

Finnst þér gaman í vinnunni og af hverju? Já, mér finnst yfirleitt gaman í vinnunni þó verkefnin séu misáhugaverð en skemmtilegast finnst mér að vinna við nýsmíði og er svo heppinn að fá að starfa við það einmitt núna. Gaman að vinna með skemmtilegu fólki og fyrir skemmtilegt fólk sem treystir manni fyrir verkefnunum.

Iðnaðarmaður vikunnar – Húsaflutningar stopp vegna starfsmannaferðar Rarik