Nafn? Hermann Daði Hermannsson

Starf og menntun? Er menntaður húsasmíðameistari og starfa sem slíkur í Borgarfirði.

Hvernig myndir þú lýsa venjulegum vinnudegi? Hann byrjar á einni hafrakexköku og einu glasi af ávaxtasafa. Klukkan átta legg ég af stað og tek símtal eða símtöl jafnvel á leiðinni í vinnuna og skipulegg daginn, svo er mjög misjafnt hvað ég geri á einum vinnudegi en allir vinnudagar snúast um að byggja eitthvað og smíða.

Hvað hlustar þú á í vinnunni? Ég hlusta lang mest á Rás 2. Er samt ekki að hlusta í rauninni, þetta er bara þarna.

Hvaða drykk færðu þér á morgnana til að koma þér í gírinn? Það er Collab.

Hver er uppáhalds iðnaðarmaðurinn þinn utan þíns fyrirtækis? Þeir eru margir í uppáhaldi. Verð samt að segja Gísli Már Arnarson rafvirki, þegar hann svarar mér. Finnst hann óþolandi þegar hann svarar ekki en þá finn ég einhvern annan uppáhalds eins og Todda pípara.

Ef þú mættir velja aðra iðn til að starfa við, hvaða iðn væri það og hvaða iðn alls ekki? Þá væri ég pípari. Sennilega væri ég síst málari, þykir mjög vænt um að aðrir geri það.

Hvað myndi sjónvarpsþáttur um þig heita? Hann myndi heita „Byggt með Bjössa og strákunum“.

Getur þú nefnt skemmtilegt atvik og líka neyðarlegt atvik sem hefur komið fyrir þig í vinnunni? Dettur helst í hug að nefna tungumálavesen. Þegar menn sem eru ekki sleipir í ensku, eru að tala við erlenda starfsmenn sem eru ennþá verri í ensku, þá verða til ný og skemmtileg orð eins og tommstick. „Do you have a tommstick on you.“ Það var neyðarlegt þegar ég og annar vorum búnir að vanda okkur við að losa rennihurð sem átti að fara í sprautun. Við tókum í sitthvorn endann og löbbuðum af stað, veltum henni á flatann og hurðin datt í tvennt. Neyðarlegasta við þetta var að Unnsteinn „grjóthleðslumeistari“ Elíasson varð vitni að þessu og hafði gaman af.

Finnst þér gaman í vinnunni og af hverju? Langflesta daga hef ég gaman af vinnunni, ætla ekki að ljúga því að það sé gaman að gera sökkul í rigningu og roki en það er gaman að vera að gera fjölbreytt verkefni og þá sérstaklega að gera hús frá grunni og til enda.

Iðnaðarmaður vikunnar – Gaman að vinna við fjölbreytt verkefni