Ekki er ofsögum sagt að skjótt skipast veður í lofti. Ég má til með að segja ykkur frá því að síðastliðinn fimmtudagsmorgun hafði ég verið boðaður til að vera viðstaddur ánægjulega undirritun. Á Akranes voru mættir tveir ráðherrar til að rita undir viljayfirlýsingu þess efnis að ríkið standi að uppbyggingu nýrrar heilsugæslustöðvar í bæjarfélaginu. Löngu tímabær aðgerð ef tekið er mið af fólksfjölgun og þeirri aðstöðu sem stöðinni er búin í dag. Í þann mund sem bæjarstjóri og ráðherrar munduðu pennana bárust tíðindi. Þýska fyrirtækið Baader var komið í þrot með að reka hátæknifyrirtækið Skagann 3X, búið var að segja upp öllu starfsfólki, 128 manns. Það þyrmdi yfir. Það féll skuggi yfir annars ánægjulega stund þarna í bæjarþingsalnum.

Þegar fyrirtæki óska eftir gjaldþrotaskiptum er skipaður skiptastjóri. Lögmaður sem tekur að sér að gæta hagsmuna þrotabúsins til að ýtrustu sanngirni sé gætt um deilingu þeirra eigna sem mögulega finnast í búinu. Skiptastjórum er einfaldlega gert að hámarka virði hins gjaldþrota fyrirtækis til að kröfuhafar skaðist sem minnst. Engum blöðum er um það að fletta að virði Skagans 3X er gríðarlega mikið, það er að segja ef það er í rekstri. Vissulega má vel vera að búið sé að hreinsa út úr fyrirtækinu einhverjar eignir sem meðal annars gætu falist í einkaleyfum og þekkingu. Ég veit ekkert um það og tíminn einn mun leiða í ljós hversu skaðinn er mikill. Skiptastjóri beið hins vegar ekki boðanna og lét það strax spyrjast út að hann væri til viðræðna um sölu þrotabúsins í heild ef menn vildu grípa keflið og endurvekja rekstur í húsunum við Krókalón á Akranesi. Nú krossa ég fingur eins og fjölmargir aðrir að svo geti orðið. Hins vegar liggur það fyrir að fjölmargir starfsmenn hafa skráð sig í atvinnuleit hjá Vinnumálastofnun og einhverjir þeirra fá vafalaust strax vinnu hjá nýjum vinnuveitendum.

Ég hef fylgst nokkuð grannt með fyrirtækjum á Vesturlandi síðastliðna þrjá áratugi. Fyrst sem starfandi atvinnuráðgjafi og síðar sem fjölmiðlamaður. Ekkert er nauðsynlegra fyrir vöxt og viðgang sveitarfélaga en örugg og arðbær atvinnustarfsemi. Af þeim sökum tek ég undir orð Vilhjálms Birgissonar formanns verkalýðsfélags staðarins sem hefur lýst Skaganum 3X sem einum mikilvægasta vinnustað bæjarins. Þar liggur gríðarleg þekking og mikill mannauður. Þetta er hátæknifyrirtæki sem þekkt er á heimsvísu fyrir nýsköpun og þjónustu við matvælaiðnaðinn. Byggir á þekkingu við vinnslu á fiski en sama tækni, svo sem ofurkæling, á alveg eins heima t.d. í kjúklingaiðnaði þar sem höndla þarf með viðkvæm matvæli.

Ég gef mér að fraukan sem er eigandi Baader í Þýskalandi hafi ekki haft neitt nema jákvætt í huga þegar hún bætti Skaganum 3X í eignasafn sitt. Fyrirfram gat hún hins vegar ekki vitað hversu gríðarlega alvarlegar afleiðingar Covid-19 hafði á matvæliðnað á heimsvísu og enn síður að stríðið í Úkraínu myndi dragast á langinn eins og raun ber vitni. Rússar hafa verið stórir viðskiptavinir þegar kemur að hátækni matvælaiðnaði, stálverð hefur þróast á verri veg og atvinnulíf almennt er laskað hvarvetna í heiminum vegna breyttrar heimssýnar. Ekkert af þessu var hægt að sjá fyrir um svipað leiti og eigendaskiptin áttu sér stað.

Hið jákvæða í þessum tíðindum liðinnar viku er að skiptastjórinn sem ráðinn var til að gæta hagsmuna þrotabúsins er þaulreyndur á sínu sviði. Hann segir fjárfesta hafa lýst yfir áhuga á fyrirtækinu. Íslensk útgerðarfyrirtæki hafa til að mynda gríðarlega hagsmuni af því að Skaginn 3X haldi áfram starfsemi í einhverri mynd. Vonandi munu þau taka höndum saman og kaupa þrotabúið sem allra fyrst þannig að skaðinn verði lágmarkaður sem kostur er. Í það minnsta er það öruggt að atvinnulíf á Akranesi þolir ekki fleiri áföll en orðið hafa á undanförnum árum í atvinnulífinu. Megi skiptastjóranum ganga sem best að vinna úr þröngri stöðu og vonandi verður þessi leiðari orðinn úreltur þegar blaðið kemur úr prentun!

Magnús Magnússon

Hver dagur skiptir máli