Óhætt er að segja að karlakórinn Söngbræður njóti sífelldra vinsælda þótt kominn sé fast að fimmtugu. Ár eftir ár hefur kórinn fyllt þau félagsheimili sem leigð hafa verið undir sviða- og hrossakjötsveislu ásamt söngskemmtun í byrjun ás. Undanfarin ár hefur skemmtunin farið fram í Þinghamri á Varmalandi sem er stærsta félagsheimilið í héraðinu. Uppselt var á viðburðinn sl. laugardag, um 340 gestir og tugir að auki á biðlista. Viðar Guðmundsson kórstjóri var kynnir en um undirleik sá Kjartan Valdemarsson.

Kórinn bauð upp á fjölbreytt úrval laga, mörg hver sem frumflutt voru. Að þessu sinni var því minna um einsöngsatriði, en kórinn býr eins og kunnugt er yfir feyknaröflugum söngvurum. Barbara Ósk Guðbjartsdóttir flutti söngatriði meðan kórfélagar voru að leggja matinn á borð. Á boðstólnum voru svið og saltað hrossakjöt með tilheyrandi meðlæti. Eftir hefðbundna dagskrá var fjöldasöngur á pallinum og margir sem nýttu sér að taka lagið með kórfélögum áður en haldið var út í frostkalda en ljósum prýdda norðurljósanóttina.

Húsfyllir á skemmtun Söngbræðra í Þinghamri