Í vetur hafa krakkarnir í 4. Bekk BS í Brekkubæjarskóla á Akranesi verið að læra um hafið og sjávarútveginn. Sem litlir Skagamenn þá er mikilvægt að þau upplifi og skilji tengslin sem þorpið okkar á við hafið, enda byggðist kaupstaðurinn upp í kringum fiskinn og sjómennskuna.

Krakkarnir voru svo heppnir að fá að heimsækja Norðanfisk á dögunum í tengslum við þessa vinnu en það er einmitt eitt af fyrirtækjunum okkar hér á Skaganum sem tengist sjávarútveginum og er að vinna afurðir úr hafinu.

Þegar krakkarnir mættu á svæðið var akkúrat verið að fara að hræra í grænmetisbuff í risastóru hrærivélinni sem þau eru með í vinnslunni. Allir fengu hárnet og stutta kennslu í hreinlætisreglum og svo fengu þau skoðunarferð um vinnsluna. Tveir nemendur úr hópnum voru svo heppnir að eiga fjölskyldumeðlim í starfsliðinu og þar urðu auðvitað fagnaðarfundir og mikið stolt að fá á sína vinnustaðinn fyrir bekkjarfélögunum.

Það var mjög spennandi að sjá hvernig grænmetisbuffin eru búin til, enda er það afskaplega vinsæll matur í matsalnum hérna í Brekkó. Krakkarnir fylgdust með hvað var sett út í hrærivélina, hvernig deigið var síðan sett inn í vél sem þjappaði það í lítil buff. Svo kom rasp utan um og svo fóru litlu buffin öll í risastóran steikingarpott og spruttu svo upp úr honum á færibandi, krispí og ilmandi ómótstæðileg. Margir stóðust ekki mátið og fengu að smakka beint af færibandinu.

Við fengum að sjá dýrindis reyktan lax skorinn og pakkaðan, kennararnir teyguðu að sér ilminum á meðan sumir krakkarnir héldu bara fyrir nefið. Þau eiga eftir að læra að kunna að meta reykta bragðið síðar meir.

Glænýr fróðleikur hjá 4. BS komin í reynslubankann og áfram halda krakkarnir að kynnast bænum sínum og samfélagi. Það eru heldur betur forréttindi að geta leitað í sitt nærsamfélag eftir lærdómstækifærum fyrir nemendur og fá þau hjá Norðanfiski kærar þakkir fyrir frábæra heimsókn.

Tinna Steindórsdóttir, umsjónarkennari í 4. bekk í Brekkubæjarskóla

Heimsókn í Norðanfisk á Akranesi