Á föstudaginn fyrir jól voru 50 nemendur brautskráðir frá Fjölbrautaskóla Vesturlands á Akranesi. Í tilkynningu frá skólanum segir að stór hluti útskriftarnema hafi lokuð dreifnámi í húsasmíði eða sautján talsins. Samtals hafi 28 lokið námi í húsasmíði þar af þrjár konur. Tveir nemendur luku námi bæði í húsasmíði og viðbótarnámi til stúdentsprófs, þrír nemendur ljúka meistaranámi, einn lýkur námi í vélvirkjum og sautján ljúka stúdentsprófi þar af fjórir sem eru að ljúka viðbótarnámi til stúdentsprófi eftir iðnnám.

Útskriftarathöfn skólans setti Dröfn Viðarsdóttir aðstoðarskólameistari og Steinunn Inga Óttarsdóttir skólameistari flutti ávarp. Bergþóra Edda Grétarsdóttir og Ísólfur Darri Rúnarsson fluttu lagið „Það snjóar,“ erlent lag við texta Valdimars Braga Skúlasonar og Flosi Einarsson sá um undirleik. Þá flutti Ólafur Páll Gunnarsson ávarp fyrir hönd fyrrverandi nemenda. Fyrir hönd útskriftarnema flutti Ólafur Kristinn Bragason ávarp.

Ásdís Erlingsdóttir hlaut viðurkenningu frá Minningarsjóði Karls Kristins Kristjánssonar fyrir störf að félagsmálum, Björg Thorberg Sigurðardóttir hlaut viðurkenningu frá Sjamma fyrir ágætan árangur í tréiðngreinum, Guðmundur Hákon Halldórsson hlaut viðurkenningu frá Trésmiðjunni Akri fyrir ágætan árangur í tréiðngreinum, Hrannar Pétursson fékk verðlaun frá SF smiðum fyrir ágætan árangur í tréiðngreinum, Ingi Þór Garðarsson hlaut hvatningu til áframhaldandi náms frá Minningarsjóði Lovísu Hrundar, Karl Sigurjónsson hlaut viðurkenningu frá SF smiðum fyrir ágætan árangur í tréiðngreinum og Þorgerður Alma Guðmundsdóttir hlaut hvatningu til áframhaldandi náms frá Minningarsjóði Lovísu Hrundar.

Fimmtíu nemendur brautskráðir frá FVA