Yfirheyrslan er fastur þátt í Skessuhorni. Gestur okkar að þessu sinni er Rósa Guðmundsdóttir framleiðslustjóri í Grundarfirði.

Nafn: Rósa Guðmundsdóttir

Hvar ertu fædd og hvenær? Ég segist vera borin og barnfæddur Grundfirðingur en fæddist samt í Reykjavík 25. janúar 1982.

Hvernig myndir þú lýsa þér í þremur orðum? Þrjú orð duga engan veginn til að lýsa mér en reynum þetta: Há (vær/vaxin), jákvæð, húmoristi.

Áttu gæludýr? Já, heldur betur, hundinn hann Tuma. Hann er einmitt núna kominn í framhaldsskóla í Hundaskólanum.

Hvers saknarðu mest frá því í gamla daga? Rólegheita án síma og samfélagsmiðla. (Shit hvað þetta er miðaldra svar).

Hvað færðu þér ofan á pizzuna þína? Pepperoni, lauk, döðlur, ananas og er bara mjög til í að prófa mig áfram.

Hvað er uppáhalds nammið þitt? Lakkrís, er alvöru Íslendingur.

Hvaða tungumál værir þú til í að kunna? Frönsku og pólsku.

Hvað er það skemmtilegasta sem þú gerir? Ferðast og njóta lífsins með fjölskyldu og vinum.

Ertu hjátrúarfull? Já og nei, fer eftir aðstæðum, ha ha. En get uppljóstrað því að við erum með draumaráðningabók klára í vinnunni.

Hvað myndi bíómynd um þig heita? Stjórnlaus himnasending.

Hver er uppáhalds mánuðurinn? Janúar.

Hvað ertu mest hrædd við? Myrkrið, er allt of ímyndunarveik.

Hver er uppáhalds skyndibitinn? Maestro Street Food Grundó City.

Hver er uppáhalds staðurinn þinn á Íslandi? Að standa og veiða við Norðurá.

Hver er minnisstæðasta gjöfin sem þú fékkst þegar þú varst lítil? Teppi sem ég fékk í jólagjöf frá ömmu minni og nöfnu. Er mjög minnisstætt vegna þess að gjöfin er enn rædd mikið í fjölskyldunni út af því hvernig ég brást við. Segi kannski frá því seinna.

Ef þú þyrftir að velja þér nýtt nafn hvað yrði þá fyrir valinu? Jáhhh, sko, þetta er pínu flókin spurning. Öll mín unglingsár fóru í að tuða um það að foreldrar mínir gáfu mér nafnið Rósa. Sem sagt bara fjórir stafir en allir aðrir í fjölskyldunni höfðu tvö og lengri nöfn. Þar sem þetta vandamál tók mikið á gelgjuna Rósu og hún lærði að kunna að meta nafnið sitt þá er erfitt að velja annað en Rósa, kannski það yrði Rósa Björk.

Hvað ætlaðir þú að verða þegar þú yrðir stór? Ég vissi aldrei hvað ég ætlaði að verða, vildi prófa allt sko. Langaði að verða flugfreyja, kennari, hjúkrunarfræðingur, læknir en enda svo sem framleiðslustjóri. Ætli sú vinna snerti bara ekki á mörgu svipuðu og öll þessi störf gera, ha ha.

Vandræðalegasta augnablikið? Úff, á svo mörg, er frekar seinheppin manneskja. Flest eru ekki birtingarhæf á prenti en ef fólk kemur og hittir á mig skal ég segja frá.

Hvar sérðu þig eftir tíu ár? Verð bakandi súrdeigsbrauð í nýja flotta og stóra húsinu mínu sem er í byggingu. Gæti verið efni í „Real Housewives of Grundarfjörður.“

Er frekar seinheppin manneskja