Söngkeppni félagsmiðstöðva á Vesturlandi fór fram í gær á Reykhólum og voru tólf frábær atriði skráð til þátttöku. Fjölbreytnin var mikil og mátti sjá hljómsveitir, söngvara og rappara stíga á svið og reyna að heilla dómnefndina. Efstu tvö sætin í keppninni unnu sér inn sæti í Söngkeppni Samfés sem fram fer í Laugardalshöll 4. maí næstkomandi.

Sigurvegari SamVest 2024 var Embla Rós Elvarsdóttir frá félagsmiðstöðinni X-inu í Stykkishólmi og flutti hún lagið No Time To Die úr samnefndri James Bond mynd í flutningi Billie Eilish. Þess má geta að Embla Rós sigraði líka keppnina í fyrra og þá með hljómsveitinni Hallgerður og rest. Var þetta þriðja árið í röð sem félagsmiðstöðin X-ið sigrar söngkeppni SamVest.

Í öðru sæti lenti Anna Lísa Axelsdóttir frá félagsmiðstöðinni Arnardal frá Akranesi en Anna Lísa flutti ABBA lagið The Winner Takes It All og fer því áfram í úrslit ásamt Emblu Rós.

Eftir söngkeppni tók við ball með þeim Ólafi Jóhanni, Audda og Steinda. Stemningin var gríðarleg, skemmtu allir sér virkilega vel og voru unglingarnir algerlega til fyrirmyndar.

Embla Rós og Anna Lísa í úrslit söngkeppni Samfés