Nafn: Kristleifur Skarphéðinn Brandsson

Starfsheiti/fyrirtæki: Viðmótsforritari í vefteymi Íslandsbanka. Vefteymi Íslandsbanka sér um ytri vefi bankans islandsbanki.is, ergo.is og islandssjodir.is. Ég starfa í fjarvinnu og er með starfsaðstöðu í nýsköpunarsetrinu Breið.

Fjölskylduhagir/búseta: Bý í skóginum í Jörundarholtinu á Akranesi með Heiðrúnu Hámundar. Ég á tvö uppkomin börn, Snorra og Heklu.

Áhugamál: Ég er dellukall þannig að áhugamálin breytast reglulega. Lífið, stjórnmál, trúarbrögð og samfélagið eru þó alltaf eitthvað sem ég hef áhuga á. Af öðrum áhugamálum má nefna golf, súrdeigsbakstur, garðrækt, nýjasta tækni og vísindi og almenn hreyfing. Svo eru sumir sem vilja halda því fram að nöldur sé eitt af mínum áhugamálum. Ég hef gaman af því að smíða og vinna eitthvað í höndunum. Undanfarin ár hef ég meðal annars byggt pizzaofn, garðhús, skólveggi og lítinn sólpall. Verkefni sumarsins er að skipta um glugga í húsinu.

Vinnudagurinn: Fimmtudagur 3. júlí

Mætt til vinnu og fyrsta verk? Ég mæti til vinnu á bilinu 8 til 9 eftir að hafa drukkið einn góðan kaffibolla í garðhúsinu mínu, vökvað og farið yfir helstu fréttaveiturnar. Mitt fyrsta verk í vinnunni er að kveikja á tölvunni og fara yfir það sem gert var í gær og huga að verkefnum dagsins og fá nýjustu fréttir frá félögum mínum í samvinnurýminu á Breiðinni.

Klukkan 10? Forritun á yfirliti yfir sjóði á nýjum vef sem við í vefteyminu höfum nýverið sett í loftið. Daglegur fundur með vefteyminu fer yfirleitt fram um þetta 10:15 og er ég því aðeins farinn að huga að honum um.

Í hádeginu? Hádegin á Breiðinni eru mjög skemmtileg og fara þar fram líflegar umræður og helstu þjóðmálin greind og jafnvel leyst. En þar sem að það var fimmtudagur þá fór ég í skyr og rúgbrauð til Margrétar systur minnar.

Um miðjan dag eða nánar tiltekið klukkan 15? Stuttur fundur með viðmótsforriturum í öðrum teymum Íslandsbanka. Ræddum vinnubrögð varðandi hvernig við vinnum með hönnunarskjöl og samskiptaleiðir milli forritara og hönnuða.

Síðasta verkið? Fara yfir kóðann fyrir birtingu sjóða og gera hann kláran fyrir notkun og birtingu á vef. Fór yfir skipulag morgundagsins, slökkti á tölvunni og kvaddi mína góðu félaga í samvinnurýminu.

Fastir liðir alla daga? Vefteymið hittist alltaf á Teams á hverjum morgni til að fara yfir verkefni frá deginum áður og skipuleggja verkefni dagsins. Í hádeginu kemur saman góður hluti þeirra sem eru með starfsaðstöðu á Breiðinni og snæðir saman nesti og ræðir málin. Það er alveg ómissandi hluti dagsins. Orð dagsins er fastur liður hjá mér og Ulf, þýskum félaga mínum sem situr á næsta borði við mig. Það felst í því að ég finn gott íslenskt orð sem við svo veltum fyrir okkur fram og til baka. Hvað þýðir orðið, hvernig er það á þýsku, tengd orð og svo framvegis. Það skapast oft skemmtilegar umræður í kringum orð dagsins.

Hvað stendur upp úr eftir vinnudaginn? Gott samstarf og góður starfsandi í vefteyminu stendur uppúr þennan vinnudag sem og aðra daga. Ég segi alltaf að forritun sé fólgin í því að finna lausn á þraut sem lögð er fyrir mann. Í dag held ég að ég hafi leyst allar þær þrautir sem lagðar voru fyrir mig.

Var dagurinn hefðbundinn? Já, mjög hefðbundinn vinnudagur sem mér líkar vel.

Hvenær byrjaðir þú í þessu starfi? Ég hef starfað hjá Íslandsbanka frá árinu 2018 en sem viðmótsforritari hef ég starfað frá árinu 2009. Þar áður starfaði ég sem sjúkraþjálfari í nokkur ár.

Er þetta framtíðarstarfið þitt? Eins og staðan er í dag þá er þetta klárlega mitt framtíðarstarf en kannski kemur upp sú staða í framtíðinni að ég fari að gera eitthvað allt annað. Kannski verð ég smiður einn daginn, eða garðyrkjumaður.

Hlakkar þú til að mæta í vinnuna? Já það geri ég. Að leysa skemmtileg verkefni með góðu fólki er alltaf tilhlökkunarefni.

Eitthvað að lokum? Ekki láta vinnuna skilgreina hver þú ert. Vinnan er það sem þú þarft að gera til að framfleyta þér og þínum. Breyttu til og prófaðu eitthvað nýtt.

Dagur í lífi viðmótsforritara