Nafn: Sigurrós Jónsdóttir

Fjölskylduhagir/búseta: Ég er gift og á tvær stelpur. Maðurinn minn heitir Lýður Snær og stelpurnar mínar Esther Nanna og Hrafntinna. Þær eru að verða 12 og 9 ára. Við búum á Akranesi og eigum tvo hunda.

Starfsheiti/fyrirtæki: Verslunarstjóri Bónus Akranesi.

Áhugamál: Mér finnst gaman að ferðast, bæði innanlands og erlendis. Útivera með fjölskyldunni í náttúrunni í kringum Akranes. Elska að lesa góðar bækur og bakstur er einnig í uppáhaldi.

Dagurinn: Miðvikudagurinn 7. febrúar 2024.

Klukkan hvað vaknaðirðu og hvað var það fyrsta sem þú gerðir? Ég fór á fætur klukkan 05:50 og burstaði tennurnar.

Hvað borðaðirðu í morgunmat? Gríska jógúrt með múslí.

Hvenær fórstu til vinnu og hvernig? Ég fór á bíl í vinnuna og var mætt klukkan 06:45.

Fyrstu verk í vinnunni? Byrjaði á örstuttri tölvuvinnu eins og alla daga. Eftir það þarf að dreifa úr brettunum og síðan fylla á hillurnar og gera fínt fyrir opnun.

Hvað varstu að gera klukkan 10? Opnaði búðina og hjálpaði til að fylla á vörur inni í kæli.

Hvað gerðirðu í hádeginu? Var að klára að ganga frá frystivörum í hádeginu og skellti mér í hádegismat.

Hvað varstu að gera klukkan 14? Ég var að panta vörur. Labba um búðina með skanna og panta það sem vantar í hillurnar.

Hvenær hætt og það síðasta sem þú gerðir í vinnunni? Ég var að vinna til klukkan 18, það síðasta sem ég gerði var að fara yfir pantanir og senda þær.

Hvað gerðirðu eftir vinnu? Verslaði kvöldmat strax eftir vinnu og beint heim.

Hvað var í kvöldmat og hver eldaði? Það voru hamborgarar í kvöldmatinn og Lýður eldaði.

Hvernig var kvöldið? Stutt stopp heima eftir vinnu, drifið kvöldmatinn af og svo beint á leiksýninguna Úlfur úlfur með stelpunum mínum.

Hvenær fórstu að sofa? Ég fór að sofa klukkan 22.

Hvað var það síðasta sem þú gerðir áður en þú fórst að hátta? Kíkti aðeins í símann eftir langan dag og fór svo út með hundana og burstaði tennurnar.

Hvað stendur upp úr eftir daginn? Að njóta með fjölskyldunni eftir langan vinnudag.

Dagur í lífi verslunarstjóra í Bónus á Akranesi