Nafn: Björn Breiðfjörð Gíslason

Fjölskylduhagir/búseta: Giftur Mörthu Lind Róbertsdóttur og saman eigum við þrjú börn sem eru 5, 8 og 12 ára. Við búum á Akranesi.

Starfsheiti/fyrirtæki: Verkfræðingur á iðnaðarsviði í teymi stjórnkerfa hjá Eflu.

Áhugamál: Bílar, tæki, tækni, golf og hreyfing.

Hvaða dagur? Mánudagurinn 17. mars 2025.

Klukkan hvað vaknaðirðu og hvað var það fyrsta sem þú gerðir? Ég vaknaði kl. 6:30 og fyrsta sem ég gerði var að bursta tennur og byrja að vekja börnin rólega, opna hurðina hjá þeim og bjóða góðan dag.

Hvað borðaðir þú í morgunmat? Soðið egg.

Hvenær fórstu til vinnu og hvernig? Ég fór á bíl í vinnuna rétt rúmlega 8 eftir að hafa komið öllum á sinn stað.

Fyrsta verk í vinnunni: Fara yfir tölvupóstinn og sjá hvort allt sé eins og það á að vera.

Hvað varstu að gera klukkan 10? Ég var að brasa við að virkja leyfi fyrir forrit í tölvunni.

Hvað gerðir þú í hádeginu? Ég fór heim í hádeginu til að borða og athuga með hundinn.

Hvað varstu að gera klukkan 14? Vinna í stjórnkerfi fyrir borholudælingu í landeldi fyrir lax sem er verið að reisa hér á landi. Það er verið að taka í rekstur nokkur risa-stór ker núna á næstu dögum og það þarf allt að vera klárt fyrir það.

Hvenær hætti og það síðasta sem þú gerðir í vinnunni? Ég hætti klukkan 16 og var þá að vinna í sama stjórnkerfi og ég var að vinna í fyrr um daginn.

Hvað gerðir þú eftir vinnu? Fór beint að sækja yngsta barnið í leikskólann.

Hvað var í kvöldmatinn og hver eldaði? Ég eldaði sjálfur, sem gerist ekki oft. Ég var með afgang af chili con carne frá kvöldinu áður en ég var ekki viss hvort það væri nóg svo að ég eldaði líka kjúklingalæri.

Hvernig var kvöldið? Kvöldið var nokkuð hefðbundið. Miðju barnið þurfti að lesa svo að ég hlustaði á það meðan ég var að ganga frá eftir matinn. Eftir það var farið í að undirbúa næsta dag. Börnin tóku saman það sem þurfti fyrir íþróttir og sund og ég græjaði nesti fyrir þau. Eftir það var farið í að baða og sturta yngri tvö börnin og svo bursta. Við erum búin að vera að lesa í Harry Potter fyrir yngri tvö börnin og þau hafa mikinn áhuga á því þessa dagana.

Hvenær fórstu að sofa? Ég fór að sofa um miðnætti.

Hvað var það síðasta sem þú gerðir áður en þú fórst að sofa? Ég var að brjóta saman þvottafjall sem var búið að safnast upp. Það gerist stundum þegar tíminn hleypur frá manni að maður nær að henda í vél og hengja upp en ekki að brjóta saman og fara með í herbergin. Ég var sem sagt að vinna það upp í kvöld.

Hvað stendur upp úr eftir daginn? Mér finnst alltaf gaman að lesa fyrir börnin á kvöldin.

Eitthvað að lokum? Tíminn líður sjúklega hratt!

Dagur í lífi verkfræðings á Akranesi