Nafn: Kristján Ingi Arnarsson

Fjölskylduhagir/búseta: Giftur Svanhvíti Lilju Viðarsdóttur og við eigum þrjú börn; 3, 6 og 10 ára. Búum í Búðardal.

Starfsheiti/fyrirtæki: Umsjónarmaður framkvæmda hjá Dalabyggð.

Áhugamál: Tónlist (flytja og njóta), útivist, ferðalög og störf viðbragðsaðila (starfa með björgunarsveitinni og slökkviliðinu).

Dagurinn: Fimmtudagurinn 23. janúar 2025.

Klukkan hvað vaknaðirðu og hvað var það fyrsta sem þú gerðir? Um kl. 7, græja sig og gengið allt fyrir daginn.

Hvað borðaðirðu í morgunmat? Banana og hleðslu, holla útgáfan af bananasplitti.

Hvenær fórstu til vinnu og hvernig? Upp úr kl. 8, akandi eins og sannur Búðdælingur.

Fyrstu verk í vinnunni? Ræsa tölvuna, kíkja í pósthólfið og fara yfir verkefni dagsins.

Hvað varstu að gera klukkan 10? Morgunkaffi með samstarfsfólki í Stjórnsýsluhúsinu, ræða daginn og veginn.

Hvað gerðirðu í hádeginu? Tek yfirleitt nesti í vinnuna og rétt tyllti mér niður til að borða það.

Hvað varstu að gera klukkan 14? Rétt að detta inn á fund byggðarráðs Dalabyggðar til að fara yfir stöðu á byggingu íþróttamiðstöðvar hér í Búðardal og fleiri verkefni.

Hvenær hætt og það síðasta sem þú gerðir í vinnunni? Henti út einum tölvupósti eftir fund áður en ég skottaðist yfir götuna að sækja í leikskólann kl. 16.

Hvað gerðirðu eftir vinnu? Kom við í búðinni og fór svo heim. Renndi yfir nýju lögin á prógrammi fyrir komandi þorravertíð hjá Meginstreymi. Allar helgar í Þorra bókaðar ásamt öðrum giggum í Góu o.fl.

Hvað var í kvöldmat og hver eldaði? Hakk og pasta, samvinnuverkefni okkar Svanhvítar þegar hún og krakkarnir komu heim af handboltaæfingu á Laugum.

Hvernig var kvöldið? Hefðbundin rútína við að hátta og svæfa. Settist svo yfir teikningar af viðbyggingu sem við erum að reisa við íbúðarhúsið til að koma öllum börnunum fyrir. Taldi saman vinkla, skrúfur o.fl. sem vantar til að nýta fyrir bæjarferð daginn eftir.

Hvenær fórstu að sofa? Kvöldið er minn tími, svo það getur stundum dregist. Fór upp í rúm rétt fyrir miðnætti.

Hvað var það síðasta sem þú gerðir áður en þú fórst að hátta? Sendi tölvupóst á Húsasmiðjuna með það sem vantaði í viðbygginguna.

Hvað stendur upp úr eftir daginn? Ekkert sérstakt, bara nóg af verkefnum og snúningum ásamt því að halda heimili með þremur ungum krökkum. Sjaldan dauð stund.

Eitthvað að lokum? Spennandi uppbygging í gangi hvort sem það er heima eða í vinnunni. Krakkarnir spenntir fyrir nýjum herbergjum og samfélagið allt fyrir nýrri íþróttamiðstöð. Vaxtasprotar í menningu og atvinnu og almennt mikill hugur í okkur Dalamönnum.

Dagur í lífi umsjónarmanns framkvæmda í Dalabyggð