Nafn: María Neves

Fjölskylduhagir/búseta: Ég bý á Akranesi og er gift Birni Viðari Jóhannssyni, smið.

Starfsheiti/fyrirtæki: Samskipta- og þjónustustjóri hjá Borgarbyggð.

Áhugamál: Ég veit fátt skemmtilegra en að ferðast, bæði innanlands og utan. Þegar tími gefst til þá tek ég upp heklunálina, er yfirleitt með góða krimmabók á náttborðinu og svo hef ég mikið dálæti á tónlist.

Dagurinn: Mánudagurinn 30. október 2023

Klukkan hvað vaknaðirðu og hvað var það fyrsta sem þú gerðir? Ég er AAA+ plús manneskja og vakna yfirleitt klukkan hálf fimm á morgnana. Að þessu sinni fór ég fram úr og hlustaði á einn fyrirlestur í skólanum á meðan ég var að koma mér í gang.

Hvað borðaðirðu í morgunmat? Hreint skyr með próteinmúslí og jarðarber.

Hvenær fórstu til vinnu og hvernig? Ég lagði af stað klukkan hálf sjö og fór á bílnum.

Fyrstu verk í vinnunni? Fyrsti klukkutíminn fer alltaf í það að renna yfir tölvupóstinn og fylla á To-do lista dagsins. Starfið mitt er mjög fjölbreytt og krefst þess að ég sé vel skipulögð, enda með marga bolta á lofti hverju sinni.

Hvað varstu að gera klukkan 10? Ég sat á fundi með verkefnastjóra á skipulagssviði þar sem við fórum yfir nýju heimasíðuna sem fer í loftið núna á fimmtudaginn. Nýja heimasíðan býður upp á ótal margar skemmtilegar nýjungar, sem dæmi verða skipulagsauglýsingar mun aðgengilegri og svo er verið að opna síðu fyrir endurskoðun Aðalskipulags.

Hvað gerðirðu í hádeginu? Ég settist niður með samstarfsfólkinu mínu og fékk mér hádegismat.

Hvað varstu að gera klukkan 14? Um þetta leyti var ég að fínpússa dagskrána fyrir aðventuhátíðina sem fram fer 3. desember nk. Það er margt sem þarf að huga að við skipulagningu, t.d. bóka skemmtiatriði og hljóðmann, tala við verkstjóra áhaldahússins varðandi skraut og við forstöðumann Safnahússins um samstarf svo fáein dæmi séu nefnd. Svo þarf auðvitað að tala við jólasveinana og athuga hvort þeir hafa tök á því að aðstoða okkur við að kveikja á jólatrénu.

Hvenær hætt og það síðasta sem þú gerðir í vinnunni? Ég hætti klukkan fjögur, en ég og forritarinn sem er að aðstoða okkur með heimasíðuna fórum yfir verkefnalistann og byrjuðum að huga að lokafrágangi.

Hvað gerðirðu eftir vinnu? Eftir vinnu fór ég beint í söngtíma. Svo fór ég að versla hrekkjavökuveitingar fyrir hrekkjavökukaffi sem verður á morgun.

Dagur í lífi samskipta- og þjónustustjóra Borgarbyggðar